Երեւանի կենտրոնում իր կնոջը ծեծելու մեջ մեղադրվող Գեւորգ Սարգսյանը՝ «Ջունգլը», դեմ է արագացված կարգով դատաքննություն անցկացնելուն, քանի որ իրեն առաջադրված մեղադրանքը չի ընդունում։ Այս մասին NEWS.am–ին ասաց նրա պաշտպան Թամարա Բաղդասարյանը։
«Գործով երկու նիստերը հետաձգվել են, հաջորդը նշանակվել է փետրվարի 27–ին, սպասվում է, որ դատաքննությունն այդ օրը կսկսվի»,– ասաց պաշտպանը։
Նշենք, որ ըստ մեղադրական եզրակացության` Գեւորգ Սարգսյանը («Ջունգլը») «Ֆեյսբուք» սոցիալական կայքում կնոջ լուսանկարները ինչ-որ անձի կողմից հավանություն տալու կապակցությամբ ծագած վիճաբանության վերաբերյալ նրա հետ խոսելու պատրվակով նոյեմբերի 26-ին հանդիպել է կնոջը, առաջարկել անցնել փողոը, սակայն նա չի համաձայնվել: «Ջունգլը», նրա ձեռքից բռնած քաշելով, անցկացրել է փողոցը, ցանկացել նստեցնել իր ընկերոջ ավտոմեքենան, ինչի ընթացքում ձեռքերով հարվածներ է հասցրել կնոջ մարմնի տարբեր հատվածներին, կծել է նրա ձախ թեւը:
Գեւորգ Սարգսյանին մեղադրանք է առաջադրվել Քրեական օրենսգրքի 118-րդ հոդվածի (ծեծ) հատկանիշներով: Նա կալանավորված է:
Գործը քննվում է Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում։
Նշենք, որ Գեւորգ Սարգսյանը մեղադրվում էր նաեւ ազատամարտի մասնակից, 52-ամյա Վարդան Թումանյանին ծեծելով սպանելու մեջ, սակայն, «Ջունգլին» Ավան եւ Նոր-Նորք վարչական շրջանների ընդհանուր իրավասության դատարանը ազատ էր արձակել՝ մերժելով խափանման միջոցը փոխելու եւ կալանք կիրառելու վերաբերյալ դատախազի միջնորդությունը:
