Հրազդանում ծնողների աչքի առջեւ 7-ամյա տղային մահացու վրաերթի ենթարկելու համար 3 տարվա ազատազրկման դատապարտված Վանիկ Սարգսյանի պաշտպանները վերաքննիչ բողոք չեն ներկայացրել։ Այս մասին NEWS.am-իմ ասաց նրա պաշտպաններից Վահե Դանիելյանը։

Վանիկ Սարգսյանի վերաբերյալ Կոտայքի մարզի ընդհանուր իրավասության դատարանի կայացրած դատավճիռն արդեն մտել է օրինական ուժի մեջ։

Հիշեցնենք, որ վրաերթը տեղի էր ունեցել 2016թ. հուլիսի 4-ին՝ ժամը 20:00-ի սահմանում: Հրազդանի բնակիչ 38-ամյա Վանիկ Սարգսյանի վարած «Վազ 2104» մակնիշի ավտոմեքենան քաղաքում դուրս էր եկել երթեւեկելի մասից եւ մայթին վրաերթի ենթարկել հետիոտն, 7-ամյա Արմենին, որը տեղում մահացել էր: Հարուցվել էր քրգործ` ՀՀ քրեական օրենսգրքի 242-րդ հոդվածի 2-րդ մասի հատկանիշներով: Վարորդը եղել է ոչ սթափ վիճակում: Վանիկ Սարգսյանը կալանավորվել էր, ապա գրավի դիմաց ազատ արձակվել:

Ըստ Հրազդանում տարածված տեղեկությունների՝ կողմերը համաձայնության էին եկել, որ տուժող կողմը բողոք չի ներկայացնի, իսկ ամբաստանյալի հարազատներն էլ դրա դիմաց բնակարան կնվիրեն։ Հենց բնակարանի հետ կապված ավելի ուշ մահացած երեխայի հայրն ու վրաերթի ենթարկած վարորդը վիճել էին, այդ ընթացքում հայրը դանակահարել էր նրան։ Կոտայքի մարզի ընդհանուր իրավասության դատարանում այժմ քննվում է դանակահարության գործը. երեխայի հայրն արդեն մի քանի ամիս է՝ կալանքի տակ է։