Հայաստանում տեղակայված ռուսական 102-րդ ռազմաբազան երկրի անվտանգության կարեւոր բաղկացուցիչներից է: ՌԻԱ Նովոստիին տված հարցազրույցում այս մասին հայտարարել է ՀՀ պաշտպանության նախարար Վիգեն Սարգսյանը:
Նա հիշեցրել է, որ հենց Հայաստանն էր իր տարածքում ռազմաբազայի տեղակայման մասին պայմանագրի ժամկետի երկարաձգման նախաձեռնողը:
«Կարծում եմ՝ սա ռազմաքաղաքական ոլորտում մեր համագործակցության նշանակալի տարրերից է, եւ մենք կարծում ենք, որ բազան կարեւոր զսպող գործոն է: Մենք Հայաստանում տեղակայված ռուսական 102-րդ ռազմաբազան երկրի անվտանգության համակարգի կարեւոր բաղկացուցիչներից ենք համարում»,- ասել է նախարարը:
Նա, միաժամանակ, նշել է, որ ներկայում ռազմաբազայի անձնակազմի թվի ավելացման հարց դրված չէ: «Ինչ վերաբերում է բազայի անձնակազմի եւ սպառազինության տեսակների ավելացմանը. դա մարտավարության հարց է: Անհրաժեշտության դեպքում նման հարցերը հաշված ժամերի ընթացքում են լուծվում: Փառք Աստծո՝ դրա համար բոլոր ուժերն ու միջոցները կան: Անձնակազմի թվի ավելացումը երբեք չի կարող ինքնանպատակ լինել: Այն պետք է պատասխանի կոնկրետ իրավիճակում կոնկրետ մարտահրավերի»,- ասել է Վիգեն Սարգսյանը:
