Բյուրեղավանի գիշերօթիկ դպրոցում 2014թ.-ին հայտնաբերված յուրացումների գործով դատաքննությունն արդեն 1,5 տարի է` շարունակվում է: NEWS.am-ի հետ զրույցում գործով ամբաստանյալ, գիշերօթիկ դպրոցի նախկին տնօրեն Գայանե Մարգարյանի պաշտպան Գագիկ Խաչիկյանը հայտնեց, որ միայն 6 նիստ հետաձգվել է տարբեր պատճառաբանություններով:
«Բացի դրանից, վկաները, տուժողները շատ են, հերթով հարցաքննվում են դատարանում: Միեւնույն ժամանակ դատաքննության ընթացքում նոր տվյալներ են ձեռք բերվել, որոնց համար, մեր կարծիքով, պետք է դատահաշվապահական փորձաքննություն նշանակվի: Այսինքն, նոր տվյալներ կան, որ ուրիշի անուններով գրանցված աշխատողների փոխարեն աշխատել են դպրոցի աշխատողները, որոնց Գայանե Մարգարյանն առձեռն վճարել է»,- ասաց Գագիկ Խաչիկյանը:
Փաստաբանը դատահաշվապահական փորձաքննություն նշանակելու միջնորդություն է ներկայացրել, որի քննարկումը դատարանը հետաձգել է:
Նշենք, որ Գայանե Մարգարյանն օրերս գրավի դիմաց ազատ է արձակվել: Նա 2014թ. նոյեմբերից կալանքի տակ էր գտնվում:
Ըստ մեղադրական եզրակացության՝ դպրոցի արդեն նախկին տնօրեն Գայանե Մարգարյանը ուղիղ 10 տարի պարբերաբար, առանց աշխատանքի ընդունելու մտադրության` շահադիտական նպատակով, կազմել է հաստատությունում փաստացի աշխատանքի չհաճախող, իսկ 2007 թվականի սեպտեմբերից կազմակերպության կադրերի գծով տեսուչ Արաքս Հովսեփյանին է հանձնարարել կազմել հաստատությունում փաստացի աշխատանքի չհաճախող ընդհանուր 16 անձի հետ աշխատանքային կեղծ պայմանագրեր: Այնուհետեւ նա անձամբ հաստատել է կեղծ պայմանագրերը, հրամանագրել է հաստատությունում փաստացի աշխատանքի չհաճախող 16 անձ, որից հետո Արաքս Հովսեփյանի եւ Փառանձեմ Մարտիրոսյանի հետ աշխատավարձի հաշվարկի պաշտոնեական կեղծ փաստաթղթեր: Դպրոցի այս երեք աշխատակիցները ելքագրել են 36 մլն 370 հազար ՀՀ դրամ:
Գայանե Մարգարյանին մեղադրանք է առաջադրվել Քրեական օրենսգրքի 179-րդ հոդվածի 3-րդ մասի 1-ին կետով, 314-րդ հոդվածի 1-ին մասով եւ 119-րդ հոդվածի 2-րդ մասի 1-ին եւ 3-րդ կետով: Փառանձեմ Մարտիրոսյանին մեղադրանք է առաջադրվել Քրեական օրենսգրքի 179-րդ հոդվածի 3-րդ մասի 1-ին կետով, 38-179-րդ հոդվածի 3-րդ մասի 1-ին կետով եւ 38-314-րդ հոդվածի 1-ին մասով: Արաքս Հովսեփյանին մեղադրանք է առաջադրվել Քրեական օրենսգրքի 38-179-րդ հոդվածի 3-րդ մասի 1-ին կետով եւ 38-314-րդ հոդվածի 1-ին մասով:
Գայանե Մարգարյանը կալանավորված էր, իսկ մյուս երկուսի նկատմամբ խափանման միջոց էր ընտրվել ստորագրություն չհեռանալու մասին:
