Պատրաստվում է Ռուսաստանի եւ Հայաստանի նախագահների հերթական հանդիպումը: Այս մասին փետրվարի 22-ին Մոսկվայում կայացած ՀՀ ԱԳ նախարար Էդվարդ Նալբանդյանի հետ համատեղ մամուլի ասուլիսի ժամանակ հայտարարել է ՌԴ ԱԳ նախարար Սերգեյ Լավրովը:
Նրա խոսքով՝ հայ գործընկորոջ հետ հանդիպման ընթացքում քննարկվել է երկկողմանի հարաբերությունների ամբողջ սպեկտրը, քննարկվել է միջազգային կազմակերպություններում գործողությունների համակարգման վերաբերյալ պայմանավորվածությունների կատարման ընթացքը: Նախարարի այցի շրջանակներում մասնակցել են արխիվային փաստաթղթերի ցուցահանդեսի բացմանը: «Սա դիվանագիտական հարաբերությունների հաստատման 25-ամյակին նվիրված միջոցառումների շարքում առաջին քայլն է»,- նշել է Լավրովը:
Նախարարի գնահատմամբ՝ անցած տարիներին հարաբերությունները դինամիկ են զարգացել, աստիճանական, առեւտրատնտեսական, ներդրումային ոլորտներում կարեւոր համաձայնություններ են ձեռք բերվել, նյութական ասպարեզում լրացուցիչ խթան է հաղորդել Հայաստանի վարչապետի վերջին այցը Ռուսաստան: Զարգանում է օրենսդրական մարմինների փոխգործակցությունը:
Լավրովը նշել է, որ Ռուսաստանը Հայաստանի արտաքին տնտեսական առաջատար գործընկերն է: Ապրանքաշրջանառության ծավալը բավական բարձր է՝ ավելի քան 1 մլրդ դոլար: Ռուսական ներդրումները Հայաստանում կապիտալ ներդրումների մոտ 40 տոկոսն են կազմում: Խոշոր համատեղ նախագծեր են իրականացվում ջերմաէներգետիկ, հեռահաղորդակցության եւ բանկային ոլորտներում: «Մենք քննարկել ենք մինչեւ 2020 թվականը երկարաժամկետ համագործակցության ծրագրի կատարման ընթացքը»,- հայտնել է նախարարը՝ հիշեցնելով, որ վաղվանից ՌԴ-ի քաղաքացիները կարող են Հայաստան մեկնել ներքին անձնագրերով:
«Մենք Երեւանը դիտարկում ենք որպես ԱՊՀ-ում առանցքային գործընկերներից մեկը: Բոլոր ինտեգրացիոն գործընթացների ակտիվ մասնակիցը»,- ընդգծել է Լավրովը՝ հավելելով, որ համագործակցությունը շարունակվում է ԵՏՄ-ի, ՀԱՊԿ-ի շրջանակներում եւ միջազգային հարթակներում:
