ԵԱՀԿ Մինսկի խմբի համանախագահների աշխատանքի ներկայիս ձեւաչափին այլընտրանքներ գոյություն չունեն: Այս մասին փետրվարի 22-ին Մոսկվայում կայացած ՀՀ ԱԳ նախարար Էդվարդ Նալբանդյանի հետ համատեղ մամուլի ասուլիսի ժամանակ հայտարարել է ՌԴ ԱԳ նախարար Սերգեյ Լավրովը:
«Եթե մենք իսկապես հավատարիմ ենք համընդհանուր ընդունելի որոշումների որոնման անհրաժեշտության վերաբերյալ սկզբունքային համաձայնություններին, ապա, իմ խորը համոզմամբ, ԵԱՀԿ Մինսկի խմբի համանախագահների աշխատանքի ներկայիս ձեւաչափին այլընտրանքներ գոյություն չունեն: Սրա օգտին են քանիցս արտահայտվել Ադրբեջանի եւ Հայաստանի նախագահները այն փաստաթղթերում, որոնց տակ դրված են նրանց ստորագրությունները, կամ որոնք նրանք համատեղ են ընդունել»,- հիշեցրել է նախարարը:
Լավրովի գնահատմամբ՝ համանախագահներն անգործության չեն մատնված, այդ թվում՝ պարբերաբար հայտարարություններով են հանդես գալիս: Նախարարը հիշեցրել է, որ Մյունխենում տեղի ունեցած համաժողովի շրջանակներում փաստաթուղթ է ընդունվել, որում հստակ ընդգծվել է այս կամ այն իրավիճակի՝ ներառյալ ղարաբաղյան հակամարտության կարգավորման համար ուժի կիրառման անթույլատրելիությունը, ռազմական հռետորաբանության անթույլատրելիությունը եւ Վիեննայում ու Սանկտ Պետերբուրգում ձեռք բերված համաձայնությունների ամբողջական կատարման անհրաժեշտությունը: «Նրանք ոչ երկիմաստ են ասում այս ձեւաչափում եւ այն սկզբունքների հիման վրա աշխատելու անհրաժեշտության մասին, որոնք համանախագահների առաջկցությամբ կողմերը համաձայնեցրել են»,- նշել է նախարարը:
