Հայաստանը բարձր է գնահատում Ռուսաստանի եւ ԵԱՀԿ Մինսկի խմբի մյուս համանախագահների ավանդը Լեռնային Ղարաբաղի հակամարտության բացառապես խաղաղ կարգավորման գործում: Այս մասին փետրվարի 22-ին Մոսկվայում կայացած Ռուսաստանի ԱԳ նախարար Սերգեյ Լավրովի հետ համատեղ մամուլի ասուլիսում հայտարարել է Հայաստանի ԱԳ նախարար Էդվարդ Նալբանդյանը:
«Հայաստանը համանախագահների հետ կշարունակի այս ուղղությամբ համատեղ ջանքերը»,- ընդգծել է Հայաստանի ԱԳ նախարարը:
Նրա խոսքով՝ Հայաստանի եւ Ռուսաստանի ԱԳ նախարարները համոզված են, որ ուժի կիրառման սպառնալիքներն անթույլատրելի են եւ վնաս են հասցնում խաղաղ կարգավորման գործընթացին:
Ի պատասխան Մյունխենում ԵԱՀԿ Միսկի խմբի համանախագահների եւ Ադրբեջանի ԱԳ նախարար Էլմար Մամեդյարովի հետ հանդիպմանն առնչվող հարցին՝ Էդվարդ Նալբանդյանը նշել է, որ միջնորդների հետ հանդիպման ժամանակ նույնպես ընդգծվել է ուժի կիրառման եւ նման սպառնալիքների անընդունելիությունը, 94-95 թվականների վաղեմության ժամկետ չունեցող համաձայնագրի, Վիեննայում եւ Սանկտ Պետերբուրգում ձեռք բերված համաձայնագրերի անշեղ կատարման անհրաժեշտությունը: «Համանախագահները նաեւ նշել են Աստրախանում ձեռք բերված գերիների եւ զոհվածների դիերի վերադարձման մասին համաձայնագրերի կատարման անհրաժեշտությունը»,- նշել է նախարարը:
