ՄԱԿ-ի պարենամթերային ու գյուղատնտեսական կազմակերպությունը Հայաստանի համար կազմել է հողն առանց վարելու մշակելու ծրագիր։ Այս մասին NEWS.am–ի թղթակցին հայտնել է FAO-ի Եվրոպայի ու Կենտրոնական Ասիայի տարածաշրջանային բյուրոյի գյուղատնտեսական հարցերով մասնագետ Ավետիք Ներսիսյանը։
Նման մշակման ձեւը հողը պաշտպանում է էրոզիայից ու միկրոֆլորայի կորստից, նաեւ ջրի գոլորշացումներից ու օգտակար նյութերի ցնդելուց։ Նրա խոսքով, կախված հողի պնդությունից ու աճեցվող կուլտուրաներից, հողը կարելի է փխրեցնել նվազագույն խորությամբ կամ էլ առհասարակ չփխրեցնել։ «Իհարկե մի շարք դեպքերում առանց փխրեցման հնարավոր չէ՝ օրինակ կարտոֆիլի դեպքում։ Բայց շատ դեպքերում հնարավոր են խնայողական մեթոդներ»,- նկատեց Ներսիսյանը;
Օրինակ Ղազախստանում 2001-ին «զրոյական փխրեցում» առհասարակ չէր գործածվում։ Իսկ հիմա երկրի հյուսիսում այդ մեթոդով է մշակվում մոտ 2 մլն հա հող։ Դրան քիչ չեն օգնում նաեւ նորարարական ագարակատերերի համար սուբսիդիաները, որոնք տրամադրվում են 2006-ից։
Ծրագիրը առաջարկում է ուսուցում գյուղացիներին ու գյուղատնտեսներին, նաեւ ցուցադրական կուլտիվացիա երկրի տարբեր մարզերում։ «Նախագծի արժեքը կազմում է 1․7 մլն դոլար, բայց FAO–ն ցավոք այդ միջոցները չի կարող տրամադրել։ Դրա համար էլ մոտ ժամանակներս մենք ծրագիրը կներկայացնենք ՀՀ կառավարությանը, իսկ նրանց համաձայնությամբ՝ նաեւ անհատ դոնորներին»,- նշեց Ավետիք Ներսիսյանը։