Փետրվարի 22-ին ՀՀ ՊՆ պաշտպանական քաղաքականության վարչության պետ Լեւոն Այվազյանն ընդունել է Կարմիր խաչի միջազգային կոմիտեի հայաստանյան պատվիրակության ղեկավար Կարոլին Դույեզին:
Կողմերը քննարկել են ՀՀ պաշտպանության նախարարության եւ Հայաստանում Կարմիր խաչի միջազգային կոմիտեի պատվիրակության միջեւ իրականացվող համագործակցությանն առնչվող հարցեր:
Լեւոն Այվազյանը բարձր է գնահատել ԿԽՄԿ-ի Երեւանի գրասենյակի օժանդակությամբ ՀՀ զինված ուժերում միջազգային մարդասիրական իրավունքի վերաբերյալ դասընթացների, գիտական-մեթոդաբանական կարողությունների զարգացման եւ իրազեկվածության բարձրացման ծրագրերի իրագործումը եւ հույս հայտնել, որ համագործակցությունը շարունակական կլինի:
Հանդիպման ընթացքում ստորագրվել է ՀՀ պաշտպանության նախարարության եւ ՀՀ-ում Կարմիր խաչի միջազգային կոմիտեի պատվիրակության միջեւ Միջազգային մարդասիրական իրավունքի ոլորտում 2017թ. համագործակցության ծրագիրը:
