«Նուբարաշեն» ՔԿՀ-ում գտնվող «Սասնա ծռեր» խմբի անդամ Արթուր Սողոմոնյանի շահերի պաշտպան Մուշեղ Շուշանյանը դիմել է, որպեսզի առողջական ծանր վիճակում գտնվող իր պաշտպանյալը տեղափոխվի ԱՆ «Դատապարտյալների հիվանդանոց» ՔԿՀ , սակայն, որեւիցե արձագանք չի ստացել: NEWS.am-ի հետ զրույցում Մուշեղ Շուշանյանը նշեց, որ Արթուր Սողոմոնյանը տառապում է ֆուրոնկուլյոզ հիվանդությամբ եւ դրա բուժումը «Նուբարաշեն» ՔԿՀ-ում իրականացնելն անհնար է:
«Ասել եմ, որ անհրաժետ է տեղափոխել «Դատապարտյալների հիվանդանոց» կամ գոնե «Նուբարաշեն» ՔԿՀ-ի բուժմաս, որովհետեւ այդ պայմաններում խցում մնալով՝ դժվար է պատկերացնել նրա բուժման կազմակերպումը: Իմ դիմումը մնացել է անարձագանք, ուղղակի չեն պատասխանել: Դեկտեմբերի սկզբին ՄԻՊ արագ արձագանքման խմբին էի ահազանգել, ժամանել էին, զրուցել էին պաշտպանյալիս հետ, հետո հանդիպեցին ինձ»,-ասաց պաշտպանը:
Մուշեղ Շուշանյանի խոսքով՝ ՄԻՊ ներկայացուցիչները ծանոթացել են իր պաշտպանյալի առողջական վիճակին, իր հետ զրուցելիս նշել, որ նրան անհապաղ բուժօգնություն է հարկավոր, սակայն, չեն արձանագրել փաստը, որ իր պաշտպանյալին քրեակատարողական հիմնարկում բուժօգնություն չի տրամարդվել:
«Նրանցից մեկը բժիշկ էր, ասաց ինձ, որ վտանգավոր հիվանդություն ա, վատ հետեւանքներ կարող է ունենալ Արթուր Սողոմոնյանի համար, եթե բուժում չիրականացվի: Ես ասել էի, որ գոնե «Նուբարաշեն» ՔԿՀ-ի բուժմաս տեղափոխեն պաշտպանյալիս, ասացին, որ չեն կարող այդ հարցում օգնել, պաշտպանյալիս ոչ մի օգնություն չտրամադրելու փաստն արձանագրել նույնպես հրաժարվեցին»,-ասաց նա:
Ավելի ավղ NEWS.am-ը տեղեկացրել էր, որ Արթուր Սողոմոնյանի առողջական վիճակը վատացել է, նա տառապում է ֆուրոնկուլյոզ հիվանդությամբ՝ նրա դեմքին, գլխին թարախային բշտիկներ են գոյանում:
Արթուր Սողոմոնյանին մեղադրանք է առաջադրվել ՀՀ ՔՕ 218 հոդվածի 3‐րդ մասի 1‐ին կետով՝ պատանդ վերցնելը եւ 235 հոդվածի 3‐րդ մասով՝ ապօրինի զենք զինամթերք ձեռք բերել, իրացնել, պահել, փոխադրել: