Մենք պատմականորեն, մյուս ժողովուրդների հետ միասին, հատուկ պատասխանատվություն ենք կրում եվրասիական մայրցամաքում կայունության ու անվտանգության համար։ Այս մասին փետրվարի 22-ին ասել է Հայաստանում Ռուսաստանի արտակարգ ու լիազոր դեսպան Իվան Վոլինկինը՝ ելույթ ունենալով Հայրենիքի պաշտպանի օրվա նախօրեին դեսպանատանը կազմակերպված հանդիսավոր ընդունելության ժամանակ։
Նրա խոսքով Ռուսաստանի ռազմական ներուժը եղել է ու մնում է միջազգային անվտանգության բաղկացուցիչը։ Անդրադառնալով ռուս ժողովրդի ռազմական ավանդույթներին՝ դեսպանը նշել է,որ Ռուսաստանում գրեթե յուրաքանչյուր ընտանիք, այսպես թե այնպես կապակցված է բանակի հետ, քիչ չեն զինվորական տոհմերը,որտեղ սերնդեսերունդ ընտրում են զինվորականի դժվար ծառայությունը։ «Այս տոնը ոչ միայն ռուսական պատմությանն է պատկանում, այլ մեր ընդհանուր տոնն է։ Մենք երախտիքի ու շնորհակալության զգացումով ենք դիմում Հայրենական մեծ պատերազմի վետերաններին, որոնք իրենց վրա են զգացել զինվորական ծառայության ամբողջ ծանրությունը՝ առանց իրենց խնայելու պաշտպանելով հայրենի հողի պատիվն ու ազատությունը»,- հավելել է Վոլինկինը։