Արդյոք Տիեզերքում մենա՞կ ենք հարցի պատասխանը կարող է գտնվել 10-20 տարվա ընթացքում՝ բնակելի գոտում 7 մոլորակների աննախադեպ հայտնագործումը կարող է հանելուկի լուծման ճանապարհին վիթխարի քայլ լինել: Այս մասին NASA-ի գիտական տնօրինության ղեկավար Թոմաս Ցուրբուխենը հայտարարել է փետրվարի 22-ին հրավիրված արտահերթ մամուլի ասուլիսի ժամանակ:
Աստղագետները առնվազն 7 մոլորակ են հայտնաբերել, որոնց չափերը Երկրի չափերի նման են: Դրանք պտտվում են սառը գաճաճ աստղ TRAPPIST-1-ի շուրջը: Դրանց եւ Երկրի միջեւ հեռավորությունը կազմում է 39 լուսատարի: Թագավորական աստղագետ սըր Մարթին Ռիսը կարծում է, որ նոր աշխարհների հայտնագործումը միայն սկիզբն է: Այս սենսացիան կարող է կյանքի համար բարենպաստ բնակելի միջավայրի եւ վայրերի հայտնաբերման գլուխկոտրուկի կարեւոր մասը լինել:
Հայտնաբերված մոլորակներից 6-ը գտնվում են չափավոր կլիմայի գոտում, որտեղ ջերմաստիճանը Ցելսիուսի 0-ից 100 աստիճանի միջակայքում է: Դրանցից առնվազն 3-ում ջուր կա: Մեզ հայտնի աստղային համակարգերից ոչ մեկն իր չափերով այդքան համադրելի չէ Երկրի չափերին: