ՀՀ բնապահպանության, ֆինանսների, տարածքային կառավարման եւ զարգացման, մշակույթի, տրանսպորտի, կապի եւ տեղեկատվական տեխնոլոգիաների նախարարությունների եւ ՀՀ բնապահպանության նախարարության բնության պետական թանգարանի ներկայացուցիչների մասնակցությամբ տեղի է ունեցել աշխատանքային հանդիպում ՀՀ տնտեսական զարգացման եւ ներդրումների նախարարության զբոսաշրջության պետական կոմիտեում:
Հանդիպմանը քննարկվել են Համաշխարհային բանկի «Տեղական տնտեսության եւ ենթակառուցվածքների զարգացում» վարկային ծրագրի շրջանակներում՝ զբոսաշրջության երթուղիները տեղեկատվական նշաններով ապահովելու հետ կապված հարցեր:
Ներկայացվել է զբոսաշրջային-տեղեկատվական նշանների տեղադրման եւ տեղեկատվական համակարգի ապահովման հայեցակարգի նախնական տարբերակը, ինչը կնպաստի զբոսաշրջության զարգացմանը՝ զբոսաշրջային արժեք ներկայացնող վայրերի, բնության հատուկ պահպանվող տարածքների (արգելոցներ, ազգային պարկեր, արգելավայրեր եւ բնութան հուշարձաններ) վերաբերյալ տեղի բնակչության եւ այցելուների իրազեկվածության բարձրացմանը:
Զբոսաշրջային ցուցանակները եւ նշանները կարեւոր բաղադրիչ են այցելուների համար հաճելի եւ հյուրընկալ միջավայր ապահովելու համար: Զբոսաշրջային-տեղեկատու ցուցանակներն ուղղության ցուցիչ-նշաններ են, որոնք այլ նշաններից տարբերվում են նրանով, որ գրվում են սպիտակ տառերով շագանակագույն հիմնագույնի վրա, եւ կարող են պատկերանշաններ պարունակել այն տեղանվան վերաբերյալ, որի մասին տեղեկություն է ներկայացվում:
Զբոսաշրջային-տեղեկատու նշանների գույնը եւ ոճը նույնականացվում է զբոսաշրջային ոլորտի հետ, եւ դրանք հեշտությամբ ճանաչելի դարձնում ճանապարհորդների համար:
Վերոնշյալ գերատեսչությունների համատեղ ջանքերով կամփոփվեն զբոսաշրջային-տեղեկատվական ցուցանակների ուղեցույցների ստեղծման աշխատանքները եւ տեղեկատվական նշանները կտեղադրվեն Հայաստանի ողջ տարածքում: