Եվրախորհրդարանը պետք է խստորեն արձագանքի Ադրբեջանի իշխանությունների ոտնձգություններին: Այս մասին հայտարարեց ԼՂՀ նախագահի մամուլի քարտուղար Դավիթ Բաբայանը՝ NEWS.am-ի թղթակցի խնդրանքով մեկնաբանելով Բաքվի վերջին նախաձեռնությանը, որի համաձայն՝ Արցախ այցելած Եվրախորհրդարանի երեք պատգամավորների նկատմամբ, իբր, հետախուզում է հայտարարվել Ինտերպոլի միջոցով:
Բաբայանն ընդգծեց, որ Ալեքսանդր Լապշինի հետ կապված պատմությունի հետո կտրուկ ավելացել է Լեռնային Ղարաբաղ այցելելու ցանկություն ունեցողների թիվը: «Սահմանադրական փոփոխությունների հանրաքվեին աննախադեպ թվով միջազգային դիտորդներ են մասնակցել՝ Բոլիվիայից մինչեւ Ճապոնիա եւ Պակիստան»,- նշեց Դավիթ Բաբայանը:
Նրա խոսքով՝ Ադրբեջանում տիրող աննորմալ իրավիճակն ինչ-որ առումով միջազգային հանրության պասիվ դիրքորոշման հետեւանք է: «Իլհամ Ալիեւը մերձավոր ազգականներին պաշտոնների նշանակելու մասին սեփական երկրի օրենքները խախտելով՝ իր կնոջը երկրի առաջին փոխնախագահ նշանակեց: Լապշինի ձերբակալությունից հետո մենք ականատես եղանք եվրոպական կառույցների, այդ թվում՝ Եվրախորհրդարանի արձագանքի բացակայությանը»,- հիշեցրեց ԼՂՀ նախագահի մամուլի քարտուղարը:
«Ադրբեջանն ահաբեկչական պետություն է: Համաձայնեք, որ ծիծաղելի կլիներ լսել, որ ԻԼԻՊ-ն ինչ-որ մեկի նկատմամբ Ինտերպոլի միջոցով հետախուզում է հայտարարել: Փաստորեն Ինտերպոլը, եթե իսկապես այդ կազմակերպության միջոցով հետախուզում են Եվրախորհրդարանի պատգամավորներին, թույլ է տալիս իրեն ներքաշել կեղտոտ քաղաքական գործընթացների մեջ»,- ընդգծեց նա:
Այս համատեքստում Բաբայանը հիշեցրեց, որ պատգամավորներն անձեռնմխելիություն ունեն, եվրոպական արժեքների կրողներ են եւ ոչ մի դատապարտելի բան չեն արել: