Վաղուց արդեն Ադրբեջանի իշխանություններն ամեն ինչ զավեշտի են վերածում՝ թե՛ միջազգային իրավունքը, թե՛ իրենց նույնիսկ ներքին կյանքը: Այս մասին, այսօր՝ փետրվարի 23-ին, կառավարության նիստից հետո լրագրողների հետ զրույցում նշել է Հայաստանի ԱԳ փոխնախարար Շավարշ Քոչարյանը՝ պատասխանելով Եվրախորհրդարանի պատգամավորներ Ֆրանկ Էնգելի, Յարոմիր Շտետինայի եւ Էլենի Թեոխարուսի նկատմամբ Ադրբեջանի կողմից միջազգային հետախուզում հայտարարելուն:
«Դա ուղղակի զավեշտ է, եւ բնականաբար որեւէ ձեւով չի կարող ազդել դեպի Արցախ այցելությունների վրա», - ասաց նա:
Ավելի վաղ NEWS.am-ը հայտնել էր, որ ադրբեջանական լրատվամիջոցները՝ վկայակոչելով Ադրբեջանի գլխավոր դատախազությունը, հաղորդել էին, որ Ինտերպոլի միջոցով, իբր, Եվրախորհրդարանի պատգամավորներ Ֆրանկ Էնգելը, Յարոմիր Շտետինան եւ Էլենի Թեոխարուսը հետախուզվում են՝ Սահմանադրության հանրաքվեի ժամանակ դիտորդական առաքելություն իրականացնելու նպատակով Լեռնային Ղարաբաղ այցելելու համար:
Ի դեպ, ՀՀ ոստիկանության մամուլի ծառայության ղեկավար Աշոտ Ահարոնյանը NEWS.am-ի թղթակցին ասաց, որ ներկայում Ինտերպոլում նման տվյալներով անձինք հետախուզման մեջ չեն:
