Պոլսո փոխպատրիարք արքեպիսկոպոս Արամ Աթեշյանն այս գիշեր ժամանել է Հայաստան: Էջմիածնում է նաեւ Պոլսո պատրիարքարանի հոգեւոր խորհրդի առաջնորդ, եպիսկոպոս Սահակ Մաշալյանը: Նրանք այստեղ են Ամենայն հայոց կաթողիկոս Գարեգին Բ-ի հրավերով (ֆոտոռեպորտաժ):
Վաղ առավոտյան նրանք մասնակցել են Սուրբ Վարդանանց տոնին նվիրված պատարագին: Պատարագից հետո NEWS.am-ի թղթակիցն Արամ արքեպիսկոպոս Աթեշյանից հետաքրքրվել` արդյոք առաջադրվելու է պատրիարքի ընտրություններում եւ որն է այցի նպատակը: Նա երկու հարցերն էլ անպատասխան թողեց:
Այսօր ավելի ուշ սպասվում է կաթողիկոսի փակ հանդիպումը արքեպիսկոպոս Աթեշյանի եւ եպիսկոպոս Մաշալյանի հետ: Ըստ տարածված տեղեկությունների, կաթողիկոսը նրանց հրավիրել է Հայաստան` Պոլսո պատրիարքի ընտրությունների պատճառով ստեղծված ճգնաժամը կարգավորելու համար:
Նշենք, որ Էջմիածնից վերադառնալուց հետո Պոլսո հայոց պատրիարքարի գլխավորությամբ հանձնաժողով է կազմվելու, որը պատրիարքի ընտրությունների համար նախատեսված դիմումը Ստամբուլի նահանգապետի միջնորդությամբ փոխանցելու են իշխանություններին:
Հիշեցնենք, որ օրեր առաջ եպիսկոպոս Մաշալյանը հրաժարական հայտնելու մասին գրավոր հայտարարություն էր տարածել՝ շեշտելով, որ այդ քայլին գնացել է Պոլսո հայոց պատրիարքական տեղապահ արք․ Արամ Աթեշյանի պահվածքի պատճառով, քանի որ վերջինս ամեն կերպ խոչընդոտում է պատրիարքի ընտրություններ անցկացնելը։
Այնուհետ հանդիպում են անցկացրել Սուրբ Փրկիչ հիվանդանոցի հոգաբարձուների խորհրդի նախագահ Պետրոս Շիրինօղլուն, Մելքոն Քարաքոսեն, Վազգեն Բարընը, փոխպատրիարք արք․ Արամ Աթեշյանն ու եպիսկոպոս Սահակ Մաշալյանը։ Հանդիպման վերջում արձանագրություն են ստորագրել։
«Մինչ ընտրությունները արք․ Արամ սրբազանը շարունակելու է լինել փոխպատրիարք։ Ընտրության օրը ենթադրաբար կլինի մայիսի 28-ին»-նշվել էր արձանագրության մեջ։