Էջմիածնում արդեն երկրորդ օրը շարունակվում է Ամենայն Հայոց կաթողիկոս Գարեգին Բ-ի հանդիպումը Պոլսո փոխպատրիարք արքեպիսկոպոս Արամ Աթեշյանի եւ  Պոլսո պատրիարքարանի հոգեւոր խորհրդի առաջնորդ, եպիսկոպոս Սահակ Մաշալյանի հետ:

NEWS.am-ին հայտնի դարձավ, որ հանդիպումը մեկնարկել է դեռեւս երեկ ցերեկը եւ շարունակվել մինչեւ ուշ գիշեր: Այսօր առավոտից էլ հանդիպումը վերսկսվել է: NEWS.am-ին Մայր Աթոռի մամուլի դիվանից հայտնեցին, որ հանդիպման արդյունքները կհրապարակվեն ավելի ուշ:

Ըստ տարածված տեղեկությունների՝ կաթողիկոսը նրանց հրավիրել է Հայաստան` Պոլսո պատրիարքի ընտրությունների պատճառով ստեղծված ճգնաժամը կարգավորելու համար: Տեղեկություններ կան, որ Արամ Աթեշյանին «կհամոզեն» չառաջադրվել առաջիկա ընտրություններում:

Հիշեցնենք, որ օրեր առաջ եպիսկոպոս Մաշալյանը հրաժարական հայտնելու մասին գրավոր հայտարարություն էր տարածել՝ շեշտելով, որ այդ քայլին գնացել է Պոլսո հայոց պատրիարքական տեղապահ արք․ Արամ Աթեշյանի պահվածքի պատճառով, քանի որ վերջինս ամեն կերպ խոչընդոտում է պատրիարքի ընտրություններ անցկացնելը։

Այնուհետ հանդիպում են անցկացրել Սուրբ Փրկիչ հիվանդանոցի հոգաբարձուների խորհրդի նախագահ Պետրոս Շիրինօղլուն, Մելքոն Քարաքոսեն, Վազգեն Բարընը, փոխպատրիարք արք․ Արամ Աթեշյանն ու եպիսկոպոս Սահակ Մաշալյանը։ Հանդիպման վերջում արձանագրություն են ստորագրել։