Բացի այն, որ ես եւ Միհրան Պողոսյանն ընկերներ ենք, եւ երկար տարիների ընկերներ, նաեւ կուսակցական թիմակիցներ ենք: Այս մասին, այսօր՝ փետրվարի 24-ին, լրագրողների հետ զրույցում նշել է Երեւանի քաղաքապետ Տարոն Մարգարյանը՝ անդրադառնալով տեղեկություններին, որ ինքը վարչական ողջ ռեսուրսը կենտրոնացրել է, որպեսզի իր աներորդուն` Ռոբերտ Սարգսյանին, ՀՀԿ տարածքային ցուցակով Երեւանի թիվ 1 ընտրատարածքից կրկին դարձնի պատգամավոր, եւ այդ համատեքստում մրցակցության մեջ է նույն տարածքում առաջադրված ԴԱՀԿ նախկին պետ Միհրան Պողոսյանի հետ:
«Թիվ 1 ընտրական տարածքում ՀՀԿ-ից 12 ռեյտինգային թեկնածուներ են մասնակցում: Բնականաբար, կուսակցությունը 12-ին էլ պաշտպանում է: ՀՀԿ-ականներն իրենք իրար դեմ չեն մրցակցում: Այն կարծիքը, որ ձեւավորվել է, եւ մամուլում փորձում են Սարգսյան Ռոբերտ-Պողոսյան Միհրան մրցակցություն վերագրել, ես դրան կողմնակից չեմ: Երկուսն էլ ՀՀԿ-ից են, մեկ թիմից են եւ միասին մրցակցելու են այլ քաղաքական ուժերի հետ»,-ասաց Տարոն Մարգարյանը:
Ավելի վաղ «Ժողովուրդ» թերթը գրել էր, որ Երեւանի քաղաքապետ Տարոն Մարգարյանը վարչական ողջ ռեսուրսը կենտրոնացրել է, որպեսզի իր աներորդուն` Ռոբերտ Սարգսյանին, ՀՀԿ ռեյտինգային ցուցակով Երեւանի թիվ 1 ընտրատարածքից կրկին դարձնի պատգամավոր: «Երեւանի քաղաքապետարանի ու դրա ենթակայության տակ գտնվող բոլոր հիմնարկների աշխատակիցներին հրահանգվել է Զեյթունում գրանցված քաղաքացիների ցուցակներ ներկայացնել:
Բանն այն է, որ Երեւանի թիվ 1 ընտրատարածքում ՀՀԿ ռեյտինգային ցուցակով բացի Ռ. Սարգսյանից՝ առաջադրվել է նաեւ ԴԱՀԿ նախկին պետ Միհրան Պողոսյանը՝ Քեթրինի Միհրանը: Ու հիմա Տ. Մարգարյանն ուզում է, որ իրենք հնարավորինս շատ ձայներ ստանան նաեւ Զեյթունից, որպեսզի ռեյտինգային ցուցակում առաջինը իրենք լինեն, այլ ոչ թե Միհրան Պողոսյանը»,-գրել էր թերթը:
