Վարչական շրջանների ղեկավարները կուսակցականներ են, երբ կսկսվի քարոզարշավը եւ իրենք ցանկություն կունենան ակտիվ քարոզչությանը մասնակցել, մենք օրենքով սահմանված կարգով դա կապահովենք: Այս մասին, այսօր՝ փետրվարի 24-ին, լրագրողների հետ զրույցում նշել է Երեւանի քաղաքապետ Տարոն Մարգարյանը՝ անդրադառնալով տեղեկություններին, որ վարչական շրջանների ղեկավարներն ու համայնքապետերը իրենց լծակներն օգտագործում են քարոզչական նպատակներով, իրենց աշխատակիցներին հանձնարարում են ցուցակներ բերել, որոնք պետք է քվեարկեն ՀՀԿ-ի օգտին:
«Դեռ քարոզարշավը չի սկսվել: Մենք պետք է փաստերով խոսենք, շատ բան են խոսում, ես էլ եմ շատ բաներ լսում այլ կուսակցությունների հետ կապված»,-ասաց նա:
Հարցին, թե մայիսի 14-ին կայանալիք Երեւանի քաղաքի ավագանու ընտրություններին ինքը քաղաքապետի թեկնածու լինելո՞ւ է, Տարոն Մարգարյանը կարճ պատասխանեց. «Կուսակցությունը կորոշի»:
