Եվրամիության եւ Հայաստանի միջեւ ազատ առեւտրի գոտու ստեղծման մասին համաձայնագիրը կարող է շուտով ստորագրվել: ՏԱՍՍ-ի փոխանցմամբ՝ այս մասին Բեռլինում հայտարարել է Եվրասիական տնտեսական հանձնաժողովի կոլեգիայի նախագահ Տիգրան Սարգսյանը: «Կարծում եմ՝ այն մոտ ժամանակներս կստորագրվի»,- ասել է նա:
Նրա խոսքով՝ Հայաստանի դիրքորոշումը մշտապես հանգել է նրան, որ մենք պետք է աշխատենք ինչպես ԵՄ-ի, այնպես էլ Եվրասիական տնտեսական միության հետ: «Մենք չպետք է հակադրենք այս երկու ուղղությունները»,- նշել է Սարգսյանը:
Նա ասել է, որ ԵՄ-ը եւ Հայաստանը ստիպված էին վերստին սկսել ազատ առեւտրի գոտու ստեղծման մասին համաձայնագրի շուրջ աշխատանքը, քանի որ նախորդ տարբերակը Բրյուսելի կողմից արգելափակվել էր: «Ցավոք, բանակցությունների վերջին փուլում եվրոպացի գործընկերների դիրքորոշումը ավելի կոշտացավ, այդ պատճառով մենք գործընթացը կրկին մեկնարկեցինք»,- պարզաբանել է նա: