Երբ մարդիկ նման բաներ են խոսում, պետք է մի փոքր ուղեղներն աշխատեցնեն: Այս մասին, այսօր՝ փետրվարի 24-ին, լրագրողների հետ հանդիպման ժամանակ նշել է ՀԱԿ խմբակցության ղեկավար, «Կոնգրես-ՀԺԿ» դաշինքի ցուցակի 3-րդ հորիզոնականը զբաղեցնող Լեւոն Զուրաբյանը՝ անդրադառնալով Արցախի պաշտպանության բանակի նախկին հրամանատար Սամվել Բաբայանի հայտարարությանը, թե «Օհանյան-Րաֆֆի-Օսկանյան» դաշինքից բացի մնացած բոլոր քաղաքական ուժերը պայմանավորվածություն են ձեռք բերել՝ ԱԺ-ում իրենց տեղերի քանակի շուրջ:
«Դրա մեջ որեւէ տրամաբանություն չեմ տեսնում: Այստեղ շատ հստակ տրամաբանություն պետք է գործի: Ոչ մեկիդ համար գաղտնիք չէ, որ մենք 4+4+4 ձևաչափով բանակցությունների արդյունքում հասանք նրան, որ ընտրություններից հետո պետք է հրապարակվեն ստորագրված ցուցակները, 1500 տեղամասերում տեղադրվելու են տեսախցիկներ, և ընտրական ողջ գործընթացը տեսանկարահանվելու է, և ուղիղ հեռարձակում է լինելու այդ ընտրատեղամասերից, բացառվելու է ուրիշի փոխարեն քվեարկելը»,- նշեց Զուրաբյանը՝ հավելելով, որ դա զգալիորեն նվազեցրել է ընտրակեղծիքների հնարավորությունները:
«Ես կարծում եմ, որ հիմա իշխանությունները մեր ջանքերի արդյունքում մի վիճակում են հայտնվել, որ պետք է մտածեն իրենց ձայների մասին, այլ ոչ թե խորհրդարանում իրենց համար հաճելի ընդդիմությանը տեղ հատկացնելու մասին»,- ընդգծեց Զուրաբյանը:
«Կոնգրես-ՀԺԿ» դաշինքի ներկայացուցիչը հայտարարեց, որ իշխանությունը հույսը դրել է բարձր չափերի ընտրակաշառքների վրա, քանի որ ընտրատեղամասերում տեսախցիկների առկայությամբ ձայներ կեղծել հնարավոր չէ. «Կաշառքի շուկան ռեակցիա է տալիս, մեծանում է: Մարդիկ ազատ, ուղիղ եթերում խոսում են այն մասին, որ իրենց կաշառք են տալիս, ասում են, թե ինչքան են տալիս: Ես լսել եմ արդեն 100 դոլարի մասին: Դա վերաբերում է Քանաքեռ- Զեյթունի կողմերում Միհրան Պողոսյանի խոստացած կաշառքներին, ուզում եմ ասել, շուկան բարգավաճում է»,- ասաց Զուրաբյանը: