Նախնական տվյալով, փետրվարի 23-ի գիշերն անսթափ վիճակում Պաշտպանության նախարարության տարածք ներխուժած Արմեն Եփրեմյանը ՊՆ-ի հետ որեւէ առնչություն չունի: Այս մասին NEWS.am-ին ասաց նրա պաշտպան Արայիկ Ալվանդյանը` անդրադառնալով տարածված տեղեկություններին, թե տղամարդն այդ քայլին գնացել է վրեժխնդրությունից ելնելով:
«Արմեն Եփրեմյանը պաշտպանության նախարարության հետ որեւէ կապ չունի: Իմ կարծիքով, մի բան խառնել է ու առանց հասկանալու մտել նախարարության տարածք: Նա առաջիկայում ցուցմունք կտա ու ամեն ինչ պարզ կլինի»,- ասաց պաշտպանը:
Արմեն Եփրեմյանը ձերբակալված է, նա կասկածյալի կարգավիճակ ունի:
Ըստ Քննչական կոմիտեի տարածած հաղորդագրության` 2017թ. փետրվարի 23-ին ժամը 00:20-ին Երեւանի բնակիչ Ա.Եփրեմյանը, գտնվելով անսթափ վիճակում, իր անձնական «Օպել Աստրա» մակնիշի ավտոմեքենայով հարվածել է ՀՀ ՊՆ վարչական համալիրի թիվ 2 մուտքի դարպասներին եւ ավտոմեքենայով՝ սահմանված կարգի խախտմամբ, ապօրինի ներխուժել ՀՀ ՊՆ տարածք:
Հսկիչ անցագրային կետի հերթապահ ենթասպան իրեն ամրակցված ատրճանակից արձակել է ութ կրակոց ավտոնեքենայի ուղղությամբ, որի արդյունքում քաղաքացի Ա.Եփրեմյանը չի տուժել:
Դեպքի առթիվ հարուցվել է քրեական գործ Քրեական օրենսգրքի 258-րդ հոդվածի 2-րդ մասով (խուլիգանությունը, որը զուգորդվել է ուրիշի գույքը ոչնչացնելով կամ վնասելով) եւ 327.6-րդ հոդվածի 1-ին մասով (զորամաս կամ հատուկ պահպանվող զինվորական այլ տարածք ապօրինի մուտք գործելը):
Կատարվում է նախաքննություն: