Քաղաքացիները կարող են կենսաթոշակային կուտակումները արտասահմանից Հայաստան փոխանցել: Այս մասին NEWS.am-ին ասաց Կենտրոնական բանկի փոխնախագահ Ներսես Երիցյանը՝ մեկնաբանելով «Կուտակային կենսաթոշակների մասին» օրենքում փոփոխությունների օրինագիծը եւ կից օրինագծերը:
Նրա խոսքով՝ դեպքեր են եղել, երբ արտասահմանից աշխատանքի են ընդունվում Հայաստանում եւ ցանկանում են իրենց հետ փոխանցել նաեւ կենսաթոշակային կուտակումները: Դրա պատճառը Հայաստանի, որպես զարգացող երկրի, ֆինանսական շուկայի մեծ եկամտաբերությունն է: «Օրինագծով այս հարցը կարգավորվում է: Եթե խորհրդարանն այն ընդունի, մենք կհեշտացնենք մեր ֆինանսական համակարգ կենսաթոշակային դրամական միջոցների ներհոսքը»,- նշեց Երիցյանը:
