Կենտրոնական ընտրական հանձնաժողովը փետրվարի 24-ի հերթական նիստում քննարկում է «Ժառանգություն» կուսակցության պատգամավորի թեկնածուների գրանցումը մերժելու պահանջով ստացած դիմումը, որոնք ընդգրկված էին «Օհանյան-Րաֆֆի-Օսկանյան» դաշինքի համամասնական ընտրական ցուցակում:
«Ժառանգության» մի քանի անդամների կողմից ԿԸՀ-ին ներկայացված դիմումում, մասնավորապես, նշված է, որ կուսակցության ոչ լեգիտիմ վարչությունը չէր կարող ընտրություններին մասնակցելու որոշում ընդունել, կուսակցության առաջնորդ Րաֆֆի Հովհաննիսյանն իրավունք չուներ ընտրություններին «Օհանյան-Րաֆֆի-Օսկանյան» դաշինքի կազմում մասնակցելու մասին համաձայնագիր ստորագրել: Հետեւաբար՝ նրանք ԿԸՀ-ից պահանջում են «Ժառանգությունից» պատգամավորի թեկնածուներին չգրանցել: «Ժառանգության» անդամ Աննա Հակոբյանը, որը ներկայացնում է պահանջը, հայտարարել է, որ կուսակցության անունից այս գործողությունները ապօրինի են եղել:
Կուսակցության փոխնախագահ Արմեն Մարտիրոսյանն էլ հայտարարել է, որ տեղի է ունեցել վարչության անդամների հետ համատեղ կուսակցության խորհրդի ընդլայնված նիստ: «Այստեղ լեգիտիմության խնդիր չկա, այստեղ խնդիրը վերաբերում է միայն ընտրություններին կուսակցության մասնակցության ձեւաչափին: Ես պատճառ չեմ տեսնում դաշինքի կազմում ընտրությանը մասնակցելու խորհրդի որոշումն անվավեր ճանաչելու համար»,- ընդգծել է Մարտիրոսյանը:
