Մեկ շնչին ընկնող փախստականների թվով Եվրոպայում՝ Գերմանիայից հետո, Հայաստանը երկրորդ տեղն է զբաղեցնում: Այս մասին, այսօր՝ փետրվարի 24-ին, ՄԱԿ-ի փախստականների հարցերով գերագույն հանձնակատարի գրասենյակի պատվիրակության հետ հանդիպման ժամանակ նշել է ՀՀ սփյուռքի նախարար Հրանուշ Հակոբյանը:
Սփյուռքի նախարարությունից NEWS.am-ին հայտնում են, որ պատվիրակության կազմում էին Հարավային Կովկասի տարածաշրջանային ներկայացուցիչ Հենրիկ Յոհաննես Վիլեմ վան դեր Կլաաուն, հայաստանյան գրասենյակի ներկայացուցիչ Քրիստոֆ Բիերվիրթը, արտաքին հարաբերությունների եւ հասարակայնության հետ կապերի պատասխանատու Անահիտ Հայրապետյանը:
Ողջունելով հյուրերին՝ նախարար Հրանուշ Հակոբյանը կարեւորեց սիրիահայերի հիմնախնդիրների լուծման ուղղությամբ կազմակերպության իրականացրած աջակցության ծրագրերը, ինչպես նաեւ նախարարության հետ ակտիվ գործընկերությունն ու սերտ համագործակցությունը:
Նախարարը ներկայացրեց սիրիահայերի հետ տարվող աշխատանքի առանձնահատկությունները, փորձը եւ արդյունքները: Նա մասնավորապես նշեց, որ միջազգային ասպարեզում պետք է բարձրաձայնել կատարած հսկայական աշխատանքի մասին, ներկայացնել Հայաստանի փորձը՝ որպես փախստականներ ընդունող երկրի օրինակելի մոդել. «Մեկ շնչին ընկնող փախստականների թվով Եվրոպայում՝ Գերմանիայից հետո, Հայաստանը երկրորդ տեղն է զբաղեցնում: Իսկ միջազգային կառույցների տրամադրած գումարը անհամեմատ քիչ է»:
Նախարարն անդրադարձավ նաեւ սիրիահայերի զբաղվածության, մասնագիտական վերապատրաստման եւ բնակարանային խնդիրներին:
Հենրիկ Յոհաննես Վիլեմ վան դեր Կլաաուն շնորհակալություն հայտնեց ջերմ ընդունելության համար եւ շեշտեց, որ տեղյակ է սիրիահայերի խնդիրների կարգավորման ուղղությամբ Սփյուռքի նախարարության իրականացրած ծրագրերի, համակարգված եւ ակտիվ աշխատանքի վերաբերյալ: Նա մասնավորապես նշեց. «Հայաստանը առանձնահատուկ երկիր է՝ իր պատմությամբ ու մշակույթով: Սփյուռքի հետ աշխատելու եզակի փորձ ունեք: Հայաստանում սիրիահայերի ինտեգրման, նրանց խնդիրները համակարգելու, դրանց լուծմանը նպաստելու ուղղությամբ նույնպես հսկայական աշխատանք է կատարվել: Բարձրարժեք ու գովելի աշխատանք է: Շնորհակալություն: Ուզում եմ, շնորհավորել ձեզ, որ կարողացել եք ստեղծել սիրիահայերի հետ աշխատելու միասնական, գործուն համակարգ: Շնորհակալություն: Կշարունակենք մեր համագործակցությունը»: