Արարատի մարզի Մասիս քաղաքում փետրվարի 23-ի երեկոյան հանրապետական թեկնածուների թիմերի միջեւ բախումների պատճառը չի եղել ՀՀԿ տարածքային ցուցակով առաջադրված Արայիկ Գրիգորյանի կողմից Մասիս քաղաքում շտաբ բացելը: Այս մասին այսօր՝ փետրվարի 24-ին, NEWS.am-ի հետ զրույցում ասաց ՀՀԿ պատգամավոր Մուրադ Մուրադյանը՝ անդրադառնալով լուրերին, թե Արայիկ Գրիգորյանը (Ավշարի Արայիկ), խախտելով պայմանավորվածությունը, Մասիսում մի քանի շտաբ է բացել եւ հենց այդ պատճառով էլ Մուրադ Մուրադյանի թիմակիցները հաշիվ են մաքրել, որն էլ ծեծկռտուքի է վերածվել:
«Շտաբ բացում են, թող բացեն, ես ի՞նչ անեմ, ես ո՞վ եմ, որ արգելեմ, ես իրավունք չունեմ, որ որեւիցե մեկին արգելեմ, կամ չարգելեմ»,-ասաց նա:
Մուրադ Մուրադյանը նաեւ չցանկացավ հստակ պատասխանել՝ արդյոք ծեծկռտուքը իր թիմակիցներն են հրահրել եւ արդյոք կան բերման ենթարկվածներ. «Ես գիշերը եկել եմ շտաբ, տեսել եմ, որ հավաքված են, ոստիկանությունը եկել, պարզել է: Իմ թիմակիցներին տանում են ոստիկանություն, ես հո չեմ գնալու՝ իմանամ, ինչ է, ինչ չի: Նախաքննությունը կպարզի, թե իրականում ինչ է տեղի ունեցել»,-ասաց նա:
Ավելի վաղ NEWS.am-ի հետ զրույցում Մուրադ Մուրադյանը նշել էր, որ ծեծկռտուքը հրահրողներից մեկը եղել է ոստիկանության վարչության պետը, թե ում մասին է խոսքը, նա չէր մանրամասնել։
Նշենք, որ տեղի ունեցածի վերաբերյալ ոստիկանության Մասիսի բաժնում հետաքննություն է իրականացվում։
Ավելի վաղ մամուլում գրվել էր, որ Հանրապետական պատգամավոր Մուրադ Մուրադյանի եւ ՀՀԿ-ական Արայիկ Գրիգորյանի թիմակիցների միջեւ բախումներ են եղել: Վեճը ծագել է այն պատճառով, որ Մուրադ Մուրադյանի որդիների ընկերներից մի քանիսն անցել են Գրիգորյանների կողմը՝ նշելով, որ խորհրդարանական ընտրություններին պաշտպանելու են նրա թեկնածությունը։