Ադրբեջանական կողմը վաղ առավոտից հրետակոծել է Թալիշը: Շփման գծի հյուսիսային ուղղությամբ ինտենսիվ կրակ բացած հակառակորդի թիրախում հենց Թալիշ բնակավայրն է եղել: Հրետակոծության արդյունքում հայկական կողմը կորուստներ չի ունեցել: Պաշտպանության բանակի առաջապահ զորամասերը պատասխան կրակ են բացել: Առաջնագծում իրադրությունն արդեն համեմատաբար հանգիստ է:
Նախընտրական քարոզչությունը դեռ չի սկսվել, իսկ տարածքային ընտրական ցուցակներով առաջադրված կուսակից թեկնածուների միջեւ ընդհարումներն արդեն սկսվել են: Մասիսում երեկ երեկոյան ծեծկռտուք է տեղի ունեցել Հանրապետականի ցուցակով նույն ընտրական տարածքում առաջադրված Մուրադ Մուրադյանի եւ Արայիկ Գրիգորյանի՝ Ավշարի Արայիկի կողմնակիցների միջեւ: Վերջինը, ի դեպ, Արարատի մարզպետ Արամայիս Գրիգորյանի եղբայրն է:
Ըստ մամուլի հրապարակումների՝ Մուրադ Մուրադյանին դուր չի եկել, որ Արայիկ Գրիգորյանը նախընտրական շտաբ է բացել Մասիսում իր շտաբի կողքին, չնայած կուսակցությունում ներքին պայմանավորվածություն է եղել, որ Գրիգորյանը չպետք է Մասիսում գործունեություն ծավալի: Զայրացած Մուրադյանը «մարդ է ուղարկել» Գրիգորյանի շտաբ, որոնք էլ ծեծել են շտաբի աշխատողներից մեկին: Այլ տեղեկությունների համաձայն էլ՝ վեճի պատճառը եղել է այն, որ Մուրադյանի որդիների ընկերներից մի քանիսը որոշել են սատարել Արայիկ Գրիգորյանին: Մուրադ Մուրադյանը, սակայն, մեզ հետ զրույցում հերքեց, որ վիճաբանության առիթը շտաբն է. «Շտաբ են բացում՝ թող բացեն, ես ո՞վ եմ, որ որեւէ մեկին արգելեմ կամ չարգելեմ»:
«Երկու քարի արանքում» կարող է հայտնվել նաեւ Տարոն Մարգարյանը: Բանն այն է, որ Երեւանի թիվ 1 ընտրատարածքում ՀՀԿ-ի ընտրացուցակով առաջադրվել են Ռոբերտ Սարգսյանն ու Միհրան Պողոսյանը: Սարգսյանը քաղաքապետի աներորդին է, Պողոսյանը՝ մտերիմ ընկերը: Տարոն Մարգարյանը, սակայն, դրանում խնդիր չի տեսնում եւ պարզաբանում է, թե ինչու:
Տարոն Մարգարյանը խուսափում է նաեւ կարծիք հայտնել Երեւանի թիվ 38 մանկապարտեզի տնօրեն Սեդա Հակոբյանի մասին: Մամուլում ձայնագրություն էր տարածվել, որում Գալուստ Սահակյանի հարսը, տեղյակ չլինելով, որ լրագրողի հետ է խոսում, քննարկում էր ամուսնու օգտին քվեարկելու համար հաշվառվելու հարցը: Նաեւ տեղեկություններ կան, որ նա իր ենթականերին հրահանգում է մարզերում բնակվող իրենց հարազատներին վերագրանցել թիվ 2 ընտրատարածքում, որտեղ առաջադրվել է նրա ամուսինը՝ Արման Սահակյանը: Քաղաքապետին այս ամենի մեջ մտահոգում է միայն հարցը՝ արդյո՞ք նա աշխատանքային ժամերին է հրահանգներ տվել:
Ամեն ինչ հարթ չէ նաեւ «Օհանյան-Րաֆֆի-Օսկանյան» դաշինքի մաս կազմող «Ժառանգության» ներսում: Կուսակցության մի խումբ անդամներ Կենտրոնական ընտրական հանձնաժողով են դիմել եւ պահանջում են չգրանցել «Ժառանգություն»-ից թեկնածուներին: Հիմնավորում են, թե կուսակցության ներկայիս վարչությունը լեգիտիմ չէ, չէր կարող ընտրություններին մասնակցելու որոշում ընդունել, իսկ Րաֆֆի Հովհաննիսյանն իրավունք չուներ ընտրություններին «Օհանյան-Րաֆֆի-Օսկանյան» դաշինքի կազմում մասնակցելու մասին համաձայնագիր ստորագրել:
ԿԸՀ-ն մերժել է դիմումը: «Ժառանգություն»-ում պնդում են, որ վարչության լեգիտիմության խնդիր չկա, իսկ դիմումի հեղինակները կուսակցությունից հեռացած Զարուհի Փոստանջյանի կողմնակիցներն են:
Պոլսո պատրիարքի ընտրության հետ կապված ճգնաժամը, կարծես, հաղթահարվում է. Արամ արքեպիսկոպոս Աթեշյանը կհեռանա: Գարեգին 2-րդ կաթողիկոսի հրավերով Հայաստան ժամանած Պոլսո պատրիարքարանի երեք միաբանները երկու օր շարունակ քննարկումներ են ունեցել Էջմիածնում: Արդյունքում համաձայնություն է ձեռք բերվել մարտի 15-ին Պոլսո պատրիարքարանում Եկեղեցական ժողով գումարել եւ տեղապահի ընտրություն կատարել: Այդպիսով կդադարեցվեն Պատրիարքական ընդհանուր փոխանորդ Արամ արքեպիսկոպոս Աթեշյանի լիազորությունները, իսկ հետո կնախապատրաստվեն Պոլսո պատրիարքի ընտրությանը:
Նոր կարգը սկսել է գործել: Ռուսաստանի քաղաքացիներն արդեն հնարավորություն ունեն Հայաստան այցելել ներքին անձնագրերով: Ներքին անձնագրով արդեն Հայաստան է ժամանել 27 քաղաքացի: Նշենք, որ կարգը գործում է միայն «Զվարթնոց» եւ «Շիրակ» օդանավակայաններում: Ցամաքային ճանապարհով ներքին անձնագրերով Հայաստանի սահմանը հատել հնարավոր չի լինի:
Կոտայքի մարզում խոշոր ավտովթար է տեղի ունեցել: Ջրվեժ գյուղում իրար են բախվել «Նիսսան» եւ «ՎԱԶ 2106» մակնիշների մեքենաները: Մարմնական վնասվածքներով 4 մարդ հիվանդանոց է տեղափոխվել: Ըստ տեղեկությունների՝ վիրավորներից մեկը ժամկետային զինծառայող է:
Կարճատեւ դադարից հետո դոլարը նորից սկսել է թանկանալ, դիրքերն են ամրապնդում նաեւ եվրոն ու ռուբլին: Արդյունքում դոլարի փոխարժեքն այսօր կազմել է 486 դրամ, եվրոյինը՝ 515, ռուբլունը՝ 8 դրամ 41 լումա, ֆունտինը՝ 610 դրամ:
Փետրվարի 25-ին նույնպես հանրապետությունում տեղումներ չեն սպասվում: Օդի ջերմաստիճանը, հատկապես ցերեկային ժամերին, կբարձրանա 4-5 աստիճանով: Երեւանում վաղն առանց տեղումների եղանակ կլինի: Գիշերը կդիտվի -8-10 աստիճան ցուրտ, իսկ ցերեկը՝ +2+4 աստիճան տաքություն: