Տարիներ շարունակ Ադրբեջանի կողմից հայության նկատմամբ վարվող այլատյացության քաղաքականությանն այս օրերին գումարվել է նաեւ համաշխարհային հանրության, մասնավորապես բարի կամքի տեր մարդկանց նկատմամբ ահաբեկումն ու անհանդուրժողականությունը: Այս մասին կոչ-հայտարարություն է տարածել Արցախի ԱԺ «Արցախի Հանրապետություն-Եվրախորհրդարան» բարեկամական խումբը:
Հայտարարությունում նաեւ ասվում է
«Լապշինի գործում» թվացյալ հաջողություն արձանագրելուց հետո Ադրբեջանի կեցվածքն ավելի լկտի ու սանձարձակ է դարձել՝ այս անգամ թիրախավորելով Եվրախորհրդարանի, տարբեր երկրների խորհրդարանների պատգամավորների, հասարակական ու քաղաքական գործիչների:
Արցախ այցելելու եւ սահմանադրության հանրաքվեի ընթացքում դիտորդական առաքելություն իրականացնելու համար Ադրբեջանի գլխավոր դատախազությունն այս անգամ էլ հանդես է եկել Եվրախորհրդարանի պատգամավորներ Ֆրանկ Էնգելի, Էլենի Թեոխարուսի եւ Յարոմիր Շտետինայի դեմ քրեական գործ հարուցելու մասին հայտարարությամբ:
Մենք մեծապես կարեւորում ենք աշխարհի տարբեր երկրներում մարդու իրավունքների պաշտպանության համար քաղաքական գործիչների կողմից ձեռնարկվող քայլերը եւ վերահաստատում մեր աջակցությունը նրանց ջանքերին:
Մենք արժեւորում ենք Ադրբեջանի շանտաժներին չենթարկվելու ԵԽ պատգամավորների վճռականությունը, փաստում, որ նրանց վարքագիծը եվրոպական արժեքներին հավատարիմ լինելու իրողության լավագույն դրսեւորումն է:
Մենք՝ ԱԺ «Արցախի հանրապետություն-Եվրախորհրդարան» բարեկամական խմբի պատգամավորներս, կոչ ենք անում միջազգային կառույցներին, հասարակական ու քաղաքական գործիչներին համարժեք քայլերով զսպել Ադրբեջանի հակաիրավական եւ հակամարդկային քայլերը, որոնք ամենաթողության տպավորություն են ստեղծում Բաքվի իշխանությունների մոտ եւ մեծապես վնասում ղարաբաղյան հիմնախնդրի խաղաղ կարգավորմանը:
«Արցախի Հանրապետություն-Եվրախորհրդարան» բարեկամական խմբի անդամներ՝
Վահրամ Բալայան
Արամ Գրիգորյան
Ռամելա Դադայան
Վարդգես Ուլուբաբյան
Գեորգի Պետրոսյան
Դավիթ Մելքումյան
Վարդգես Բաղրյան
Գագիկ Բաղունց
Հայկ Խանումյան
Ստեփանակերտ
25 փետրվարի, 2017 թ.
