Ազգային ժողովի ՀՀԿ խմբակցության պատգամավոր, գործարար Սամվել Ալեքսանյանն ընտրակաշառքի մասին խոսակցություններին ծանոթ չէ: Այս մասին նա հայտարարել է այսօր՝ փետրվարի 27-ին, ԱԺ-ում լրագրողների հետ զրույցում: Նա նշել է, որ ինքը բարեգործություն է անում, որը կապ չունի ընտրակաշառքի հետ. «Այո, անում եմ, բայց դա ի՞նչ կապ ունի ընտրակաշառքի հետ»։
Ինչ վերաբերում է Հեղինե Բիշարյանի հետ հարաբերություններին, քանի որ երկուսն էլ առաջադրվել են նույն ընտրական տարածքում (Մալաթիա Սեբաստիա-Շենգավիթ), Ալեքսանյանն ասաց. «Մենք միշտ էլ հաշտ ենք։ Ինքը միշտ էլ Շենգավիթ համայնքից դրել է, հիմա մենք մեղավո՞ր ենք որ այդ երկու համայնքը իրար միացրին»:
Հայտնի գործարարի խոսքով, միայն ընտրությունը ցույց կտա, թե Հանրապետականը քանի տոկոս ձայն կհավաքի, իսկ եթե ինքը հանկարծ չանցնի, ապա կշարունակի բարեգործություն անել։
Լրագրողների հաջորդ հարցադրմանը, թե այսքան տարի եղել է ԱԺ պատգամավոր, հիմա ի՞նչ անելիք ունի, որ կրկին ուզում է պատգամավոր դառնալ՝ հաշվի առնելով իր պասիվությունն ԱԺ-ում, Սամվել Ալեքսանյանն արձագանքեց. «Լիքը, լիքը գործ եմ արել... Բայց ո՞վ ասաց, որ մենք սուտ ենք խոսում, ես սուտ չեմ խոսելու։ Իսկ եթե ձեզ հետաքրքրում է, եկեք քարոզարշավի ու կիմանաք։ Հիմա խի՞ ասեմ ձեզ, մեկ էլ գնաք ուրիշներին ասեք»,- ասաց Ալեքսանյանը։
