Այս Ընտրական օրենսգրքի ամենամեծ առավելությունն այն է, որ բացառում է կարուսելը, հետեւաբար՝ ընտրակաշառք բաժանելու որեւէ շարժառիթ: Այս մասին, այսօր՝ փետրվարի 27-ին, Ազգային ժողովում հայտարարել է ՀՀԿ խմբակցության պատգամավոր Խոսրով Հարությունյանը:
«Ինձ ավելի շատ զարմացնում է այն, որ նստած քաղաքական ուժերը ընտրակաշառքի մասին խոսում են այնպես, կարծես թե իրենք այսպես կուսական կեցվածք ունեն: Գնացեք Գյումրիում հարցրեք՝ ով էր ընտրակաշառք բաժանում եւ ով է բարձրացրել ընտրակաշառքի գինը: Գնացեք գյումրեցիներին հարցրեք, ու կպարզվի, որ ընտրակաշառքն այնպես չի, որ ակնհայտորեն վերագրում են միայն իշխանական ուժին, բոլորն՝ առանց բացառության, այդ արատն օգտագործում են»,- ընդգծեց Խոսրով Հարությունյանը:
Նրա այս հայտարարությունը թեժացրեցին մթնոլորտը խորհրդարանում: Մասնավորապես, ՀԱԿ խմբակցության պատգամավոր, «Քաղաքացիական պայմանագիր» կուսակցության անդամ Նիկոլ Փաշինյանը հայտարարեց, որ իրենք չեն բաժանում ընտրակաշառք, թող չասի՝ առանց բացառության:
ՀԱԿ ղեկավար Լեւոն Զուրաբյանն էլ իր հերթին՝ ասաց. «Կոնգրեսը երբեք ընտրակաշառք չի բաժանել»:
