Ադրբեջանական գրոհայինների դիակները չեզոք գոտուց տարհանվել են: Այս մասին NEWS.am-ին հայտնեց Լեռնային Ղարաբաղի նախագահի մամուլի քարտուղար Դավիթ Բաբայանը:
Դա տեղի է ունեցել Կարմիր խաչի միջազգային կոմիտեի և ԵԱՀԿ գործող նախագահի անձնական ներկայացուցչի դաշտային օգնականների մասնակցությամբ: Գործընթացն ավարտվել է Երեւանի ժամանակով մոտ ժամը 17:00-ին: Արցախի հանրապետության պաշտպանության նախարարության մամուլի ծառայությունը նշում է, որ տարհանման գործընթացն իրականացվել է համաձայն փետրվարի 25-ին ձեռքբերված պայմանավորվածության, այսինքն այնպես, ինչպես սկզբնական շրջանում պնդել է արցախյան կողմը:
Մեկնաբանելով ադրբեջանական կողմի ուշացած փորձերը պնդելու, որ դիերն իբր գտնվել են ադրբեջանական կողմում, այլ ոչ թե չեզոք գոտում, Դավիթ Բաբայանն ընդգծեց, որ դա իրականությանը չի համապատասխանում: «Դիերը գտնվել են չեզոք տարածքում: Ադրբեջանական կողմի իրավիճակը խեղաթյուրելու փորձերը հետապնդում են այնպիսի պատկեր ստեղծելու նպատակ՝ իբր զոհվածները «հայրենիքի սահմանն են պաշտպանել», իսկ դա այդպես չէ: Զինվորները եւ սպաները զոհվել են հարձակվելիս»,- նշեց Դավիթ Բաբայանը:
«Դիերը գտնվել են չեզոք գոտում, եւ Ադրբեջանը չէր կարողանում իր ուժերով նրանց այնտեղից հանել: Կամ պետք է հատուկ գործողության դիմեր, ինչպես դա արեց Լեռնային Ղարաբաղի Պաշտպանական բանակը, երբ ադրբեջանական կողմը ստորաբար խոցեց շփման գծին մոտ թռչած ղարաբաղյան ուղղաթիռը: Այդ ժամանակ ադրբեջանական կողմը մի քանի օր շարունակ միջազգային կազմակերպությունների ներկայացուցիչներին թույլ չէր տալիս ուղղաթիռին մոտենալ՝ խախտելով բոլոր գրված եւ բարոյական օրենքները»,- ընդգծեց Դավիթ Բաբայանը:
Նա նաեւ հիշեցրեց, որ նախօրեին Ադրբեջանը ձախողել է մարմինները հանելու գործընթացը: «Ադրբեջանի իշխանությունները չեն համարձակվել դա երկրորդ անգամ անել՝ վախենալով սեփական հասարակության արձագանքից»,- նշեց Դավիթ Բաբայանը: