Ռազմավարական ձեռնարկությունները եւ ենթակառուցվածքները պետք է պետությունը կառավարի, իսկ փոքր բիզնեսում օգտակար է նաեւ մասնավոր նախաձեռնությունը: Այս մասին փետրվարի 27-ին՝ լրագրողների հետ հանդիպման ժամանակ հայտարարեց Միավորված առաջադեմ կոմունիստական կուսակցության նախագահ Վազգեն Սաֆարյանը, որը Հայաստանի Կոմունիստական կուսակցության պատգամավորի թեկնածուների համամասնական ցուցակի համապետական ընտրական ցուցակի 2-րդ հորիզոնականն է զբաղեցնում:
Ներկայացնելլով կուսակցության նախընտրական ծրագիրը՝ նա նշեց, որ խոշոր ձեռնարկությունները այն ակտիվն է, որը պետք է խելամիտ տնօրինել: Այլապես կստացվի այնպես, ինչպես եղավ «Նաիրիտի» դեպքում՝ հազարավոր մարդիկ գործազուրկ դարձան: «Աշխատավորը պետք է աշխատելու հնարավորություն ունենա: Աշխատանքը յուրաքանչյուրի իրավունքն է: Իսկ պետությունը պետք է այդ իրավունքի երաշխավորը լինի: Դրա հետ մեկտեղ, պետք է քիչ զբաղվածների եւ փոքր բիզնեսի շրջանում մասնավոր նախաձեռնություն թույլ տալ: Մասնավորը լավ է ընտելանում առեւտրի, ծառայությունների, ոչ մեծ արտադրության ոլորտներում»,- նշեց Սաֆարյանը:
