Որքան էլ հայկական կողմը պատրաստ է խելամիտ փոխզիջումների, այնուամենայնիվ այս խնդրում ելակետային է Լեռնային Ղարաբաղի ժողովրդի ազատ կամարտահայտությամբ իր ապագան որոշելու իրավունքը: Այդ մասին այսօր՝ փետրվարի 27-ին Բրյուսելում ասել է ՀՀ նախագահ Սերժ Սարգսյանը Եվրոպական խորհրդի նախագահ Դոնալդ Տուսկի հետ համատեղ ասուլիսում:
«Այստեղ որեւէ այլ մոտեցում չի կարող լինել»,- նշել է նախագահը:
Նրա խոսքով, ղարաբաղյան համակարգությունը չունի ռազմական լուծում: «Լեռնային Ղարաբաղի ժողովրդի ինքնորոշման իրավունքը ոչ միայն հռչակված է միջազգային հիմնարար փաստաթղթերով, այլեւ վաղուց արդեն ճանաչված եւ ամրագրված է հակամարտությամբ զբաղվող միակ մասնագիտացված կառույցի՝ ԵԱՀԿ ՄԽ խմբի համանախագահների բազմաթիվ հայտարարություններում: Ասել է, թե սա ոչ միայն Հայաստանի, այլեւ միջազգային հանրության հավաքական ընկալումն է հարցի շուրջ»,- նշել է Սարգսյանն ու հավելել. «Մենք շնորհակալ ենք հակամարտության խաղաղ կարգավորման ուղղությամբ Եվրամիության հավասարակշռված դիրքորոշման համար, ԵԱՀԿ ՄԽ համանախագահներին վստահելու եւ աջակցելու համար:
Եվրամիությունը քաղաքակիրթ հարաբերություններ կառուցելու ուսանելի պատմություն է, հարեւանների միջեւ խնդիրները միասնաբար հաղթահարելու պատմություն է, ինչի կարիքը մենք այսօր ունենք»:
