ՆԱՏՕ-ն հավատարիմ է ՀԱյաստանի հետ աշխատանքին, քանի որ համագործակցությունը համապատախանում է երկու կողմերի շահերին։ Այս մասին հայտնել է Դաշինքի գլխավոր քարտուղար Ենս Սթոլթենբերգը Բյուսելում ՀՀ նախագահ Սերժ Սարգսյանի հետ հանդիպումից հետո։
Նա ողջունել է Հայաստանի հետ համագործակցությունը՝ նշելով Հյուսիսատլանտյան համագործակցության խորհրդին Հայաստանի միացման 25-րդ տարեդարձը, որը գործընկերության հիմքն է։
Սթոլթենբերգը շեշտել է Հայաստանի կարեւոր ավանդը Աֆղանստանում ՆԱՏՕ-ի առաքելության ու ահաբեկչության դեմ պայքարի գործում։ Հայաստանը նաեւ իր ավանդն է ներդրել Կոսովոյում ՆԱՏՕ-ի առաքելությանը, ապահովելով կայունություն արեւմտյան Բալկաններում։ «Հայկական ստորաբաժանումները կայունություն են բերել այդ երկրներ, ապահովելով անվտանգություն»,- հավելել է նա։ Դաշինքի գլխավոր քարտուղարը գնահատել է Հայաստանի մասնակցությունը ՆԱՏՕ-ի Building Integrity ծրագրին, որն ուղղված է զինված ուժերում կոռուպցիայի դեմ պայքարին, նաեւ այն առաջընթացը, որին Հայաստանը հասել է ՄԱԿ ԱԽ 1325 բանաձեւի իրականացման գործում, որն ուղղված է խաղաղության ու անվտանգության հարցերում կանանց դերակատարման բարձրացմանը։
ՆԱՏՕ-ն ու Հայաստանը մշակում են գործողությունների նոր ծրագիր, ու գլխավոր քարտուղարը տեսնում է սերտ համագործակցության հեռանկարներ ռազմական կրթության ու պաշտպանական բնագավառի բարեփոխումների ոլորտներում։