Ապրիլյան պատերազմն ու դրանից հետո շարունակվող կանոնավոր կրակահերթը՝ ծանր հրետանու եւ զինտեխնիկայի կիրառմամբ, փաստում են, որ այլեւս այդ հակամարտությունն «ակտիվ» է: Այդ մասին այսօր՝ փետրվարի 27-ին Բրյուսելում ասել է Հայաստանի նախագահ Սերժ Սարգսյանը՝ ՆԱՏՕ-ի գլխավոր քարտուղար Յենս Սթոլթենբերգի հետ համատեղ ասուլիսում:
«Ապրիլյան պատերազմն ու դրանից հետո շարունակվող կանոնավոր կրակահերթը՝ ծանր հրետանու եւ զինտեխնիկայի կիրառմամբ, փաստում են, որ այլեւս այդ հակամարտությունն «ակտիվ» է, եւ այսօր առավել քան երբեւէ անհրաժեշտ է, որպեսզի ողջ միջազգային հանրությունը միավորվի քաղաքակիրթ լուծման շուրջ՝ աջակցելով հակամարտության խաղաղ կարգավորման ուղղությամբ գործադրվող ԵԱՀԿ Մինսկի խմբի ջանքերին»,- նշել է Սարգսյանը՝ մեկ անգամ ես շեշտելով Հայաստանի հանձնառությունը ղարաբաղյան խնդիրը խաղաղ ճանապարհով կարգավորելու ուղղությամբ:
«Մենք փաստեցինք, որ համաձայն «Գործընկերություն հանուն խաղաղության» ծրագրի շրջանակային փաստաթղթի՝ «Հիմնարար ազատությունների եւ մարդու իրավունքների պաշտպանությունն ու ամրապնդումը, ազատության եւ արդարության ապահովումը, եւ ժողովրդավարության միջոցով խաղաղության հաստատումն առանցքային ընդհանուր արժեքներ են գործընկերության համար»,- նշել է Սարգսյանը:
Նախագահը նշել է, թե քառորդ դար առաջ էր, երբ ՀՀ-ն հիմք դրեց ՆԱՏՕ-ի հետ համագործակցությանը եւ այդ ընթացքում համագործակցությունն աճել է: «Հայաստան-ՆԱՏՕ հարաբերությունները ունեն բավական հարուստ օրակարգ: Այն ներառում է թե ամենաբարձր մակարդակներում քաղաքական երկխոսություն, թե գործողությունների այլ օրինակներ: «Հայաստանը դաշինքի անդամների կողմից դիտարկվում է որպես ակտիվ գործընկեր, իսկ խաղաղապահ առաքելություններին մասնակցող մեր զինվորականները որպես կարգապահ զինվորականներ»,- նշել է Սարգսյանը: