«Սասնա ծռեր» խմբի գործով մեղադրյալ Արթուր Սարգսյանին` «Հաց բերողին», ազատ արձակելու պահանջով երթի մասնակիցները քիչ առաջ վերադարձան Ազատության հրապարակ: Երթի կազմակերպիչներից Շահեն Հարությունյանը հայտարարեց, որ անժամկետ նստացույց են անելու Ազատության հրապարակում:
«Մենք շարունակելու ենք նստացույցը, եւ ամեն օր ժամը 18:00-ից սկսած երթ ենք անելու` ի պաշտպանություն «Հաց բերողի»»,- ասաց Շահեն Հարությունյանը:
Նշենք, որ ցուցարարներն այսօր` փետրվարի 27-ին, երթով գնացին Գլխավոր դատախազության շենքի մոտ` պահանջելով ազատ արձակել Արթուր Սարգսյանին: Թեեւ երթի մասնակիցներից մի քանիսը ցանկանում էին այնուհետեւ գնալ «Դատապարտյալների հիվանդանոց» քրեակատարողական հիմնարկ, ցուցարարներն այնուամենայնիվ վերադարձան Ազատության հրապարակ:
Հիշեցնենք, որ «Սասնա ծռեր» զինված խմբին օժանդակելու մեջ մեղադրվող Արթուր Սարգսյանն ազատ էր արձակվել 2016 թվականի դեկտեմբերի 31-ին, քանի որ ազատազրկման հետ անհամատեղելի հիվանդություն ուներ: Փետրվարի 9-ին, սակայն, նա կրկին կալանավորվել էր: Արթուր Սարգսյանը հացադուլ է հայտարարել եւ պահանջում է փոխել իր խափանման միջոց կալանքը: