Հայաստանի ԱԻՆ-ում, այսօր՝ փետրվարի 28-ին, ժամը 01:31-ին տեղեկություն է ստացվել, որ Երեւան-Մեղրի ավտոճանապարհի «Հարսնաքար» ռեստորանի մոտակայքում տեղի է ունեցել ավտովթար, ավտոմեքենան դուրս է եկել ճանապարհի երթեւեկելի հատվածից եւ ընկել Արփա գետը, կան տուժածներ. անհրաժեշտ է փրկարարների օգնությունը:
Դեպքի վայր են մեկնել մեկ մարտական հաշվարկ եւ մարզային ճգնաժամային կառավարման կենտրոնի օպերատիվ խումբը:
Պարզվել է, որ Մ-2 ավտոճանապարհի Երեւան-Մեղրի հատվածի 109-րդ կմ-ում՝ «Հարսնասար» ռեստորանի մոտակայքում, «Mercedes C class» մակնիշի 34 RM 288 պետհամարանիշի (վարորդ՝ 33-ամյա Զոհրաբ Զ.) ավտոմեքենան դուրս է եկել ճանապարհի երթեւեկելի հատվածից եւ ընկել Արփա գետը:
Մինչ փրկարարների կանչի վայր հասնելը՝ վարորդը եւ ուղեւոր՝ 25-ամյա Գեւորգ Ն.-ն ինքնուրույն դուրս են եկել ավտոմեքենայից եւ հայտնվել գետի հակառակ ափին:
Փրկարարները տուժածներին տեղափոխել են գետի մյուս ափ եւ մոտեցրել շտապօգնության ավտոմեքենային:
Տուժածները հոսպիտալացվել են Եղեգնաձոր քաղաքի ԲԿ, որտեղ բժիշկները նրանց առողջական վիճակը գնահատել են բավարար: