ԲՀԿ խմբակցության պատգամավոր Բազմասեր Առաքելյանը հայտարարել է, որ Փարպի գյուղում ՀՅԴ ներկայացուցչին չի ծեծել:
«Ոչ մի միջադեպ չի եղել, մնացածը դուք կիմանաք առաջիկայում, ես ծեծկռտուք արել եմ 15 տարի առաջ, երբ որ մարզիկ էի, երբ որ գորգի մեջ, ռինգի մեջ եմ եղել»,- այսօր՝ փետրվարի 28-ին, ԱԺ-ում լրագրողների հետ զրույցում նշել է Բազմասեր Առաքելյանը:
Հիշեցնենք, որ ՀՅԴ ներկայացուցիչները տեղեկություններ տարածեցին, որ Արագածոտնի մարզում առաջադրված ՀՀԿ-ական թեկնածու Բազմասեր Առաքելյանը ծեծի է ենթարկել դաշնակցականններից մեկին: Ավելի ուշ տեղեկություններ տարածվեցին, որ նրա թիրախում է նաեւ Արագածոտնի նախկին մարզպետի եղբայրը:
Անդրադառնալով այս տեղեկությանը՝ Բազմասեր Առաքելյանն ասաց. «Էդ ի՞նչ հարց ես տալիս, մի հատ ինձի նայի: Ես ասում եմ՝ ծեծկռտուք, քաշքշուկ, նման բաներ արել եմ 15 տարի առաջ, երբ որ մարզիկ էի: Պտի նման հարց ինձ չտաք, ես Ազգային ժողովի պատգամավոր եմ, նման բաներն իմ վրով չեն»:
Բազմասեր Առաքելյանն ասաց, որ ինքն ամեն ինչ պետք է անի, որպեսզի իր ընտրատարածքում ընտրություններն անցնեն ժողովրդավար ու անբիծ: