Գործող իշխանությունների օրոք «Մարտի 1»-ը չի բացահայտվի, քաղաքական իրավիճակ պետք է փոխվի, որ այն բացահայտվի: Այս մասին, այսօր՝ փետրվարի 28-ին, մամուլի ասուլիսի ժամանակ հայտարարել է «Քաղաքացիական պայմանագիր» կուսակցության վարչության անդամ, «Ելք» դաշինքի 3-րդ հորիզոնական զբաղեցնող, ԱԺ պատգամավոր Նիկոլ Փաշինյանը:
Նրա խոսքով, Մարտի 1-ի օրը չպետք է լինի որևէ քաղաքական ուժի մենաշնորհ. «Մենք պատեհ էլ չենք համարում, որ Մարտի 1-ի օրը քաղաքական ուժերն Ազատության հրապարակի համար կռիվ տան: Այդ նպատակով «Ելք» դաշինքը բանակցել է ՀԱԿ-ի հետ՝ հետմարտիմեկյան հանրահավաքին մասնակցելու խնդրանքով, սակայն ՀԱԿ-ը քննարկել և մերժել է առաջարկը՝ պատճառաբանելով, թե զոհերի հարազատները դեմ են նման ֆորմատին: Ես անձամբ զրուցել եմ նրանցից ոմանց հետ, որոնք հերքել են ՀԱԿ-ի պատճառաբանությունը»:
Փաշինյանը կարծիք հայտնեց, որ տգեղ է, երբ փորձ է արվում մարդկանց մանր մանիպուլյացիաների ենթարկել. ստացվում է, որ մարտի 1-ին հարթակում պետք է լինեն մարդիկ, որոնք մարտի 1-ին ոչ թե հարթակում էին, այլ իրենց տանը թեյ էին խմում»,-ասաց նա՝ չմանրամասնելով, թե ում նկատի ունի:
Նշենք, որ 2008-ի Մարտի 1-ին, երբ Ազատության հրապարակում իշխանությունների կողմից ուժ կիրառելուց հետո բազմահազարանոց հանրահավաք էր ընթանում Մյասնիկյան արձանի մոտ, որի մասնակիցները պահանջում էին ՀՀ առաջին նախագահ Լեւոն Տեր-Պետրոսյանին, վերջինս այդպես էլ չեկավ՝ պատճառաբանելով, որ իշխանությունները թույլ չեն տալիս տնից դուրս գալ թիկնապահների ուղեկցությամբ: