Մարտի 1–ին 18։00–ին Հայ ազգային կոնգրեսը հանրահավաքի է հրավիրում՝ ի հիշատակ՝ 2008–ի բախումների զոհերի։ Այս մասին փետրվարի 28–ին ՀՀ խորհրդարանում հայտարարել է Հայ Ազգային կոնգրեսի խմբակցության քարտուղար Արամ Մանուկյանը։
Նա վստահեցնում է, որ հանրահավաքը չի լինի ո՛չ քաղաքական, ո՛չ նախընտրական։ Հանրահավաքին կհետեւի երթը դեպի Մյասնիկյանի արձան, որից ոչ հեռու 9 տարի առաջ տեղի ունեցան ողբերգական իրադարձությունները՝ խլելով 10 մարդու կյանք։
Հիշեցնենք, որ մարդկանց խլված կյանքերի համար ոչ ոք չի պատժվել։ Մանուկյանը հավելել է, որ գործը փոխանցվել է Մարդու իրավունքների եվրոպական դատարան։ «Հույս ունեմ, նրանք շուտով կսկսեն դրա ուսումնասիրությունն ու վճիռ կկայացնեն», - ամփոփել է ընդդիմադիրը։
