Ապրիլի 2-ին կայանալիք խորհրդարանական ընտրություններին ընդառաջ կա «միգրացիա եւ չու»: Այս մասին այսօր՝ փետրվարի 28-ին, Ազգային Ժողովում ասել է ԲՀԿ խմբակցության ղեկավար Նաիրա Զոհրաբյանը:
«Այս ընթացքում իշխանության բոլոր ներայացուցիչները խոսում են անբիծ ընտրություններ անցկացնելու մասին: Անբիծ ընտրության դրույթ համար առաջինը` միգրացիա կամ քվեների չու: Իհարկե, թռչունների չու տաք երկրներ լսել էինք, բայց ներքին միգրացիա, ներքին տեղահանում, երբ բնակիչներին ՀՀ տարբեր տարածքներից տեղահանում են մի բնակավայրից մյուսը չէինք լսել, եւ այն, ինչ կատարվում է հիմա անձնագրային ծառայությունում ուղղակի անըդունելի է: Այստեղ լրջագույն ընտրակեղծարարության մանիպուլյացիաներ են թաքնված: Ես հիմա դիմում եմ Հայաստանում դիտորդական առաքելություն իրականացնող բոլոր կազմակերպություններին, տեսեք, թե ինչ է կատարվում»,-ասել է նա:
Ըստ Նաիրա Զոհրաբյանի՝ ընտրություններին ընդառաջ ավելացել է նաեւ Հայաստանի ընտրողների թիվը:
«Ոստիկանությունը ԿԸՀ-ին տրամադրել է տեղեկանք` ՀՀ-ում ընտրողների թվի վերաբերյալ, եւ ըստ այդմ` 2016 թվականի դեկտեմբերի 30-ի տվյալներով ՀՀ-ում կա 2.564.334 ընտրող, եւ նեւյն ժամանակահատվածի համաձայն՝ Ազգային վիճակագրական ծառայությունը տրամադրել է տեղեկանք, ըստ որի` ՀՀ-ում կա 2.993.000 մարդ: Ստացվում է, որ Հայաստանում ապրողների 85 տոկոսը 18-ից բարձր տարիքի են, ստացվում է, որ նրանք ընտրող են: Այսինքն` վերջին տարվա ընթացքում ՀՀ-ից արտագաղթել են բացառապես 1-ից 18 տարեկան անչափահասներ եւ սա ուղղակի աբսուրդ է:
Նույն Ազգային վիճակագրական ծառայության տվյալների համաձայն` ընտրողների թիվը 268.000-ով ուռճացված է»,-ասել է նա: