Մարտի 1-ին խորհրդարանը 2-րդ եւ վերջնական ընթերցմամբ ընդունեց «Կուտակային կենսաթոշակների մասին» օրենքում փոփոխությունների օրինագիծը: NEWS.am-ի թղթակցի փոխանցմամբ՝ կողմ է քվեարկել 59 պատգամավոր, դեմ՝ 29, ձեռնպահ է մնացել 2 պատգամավոր:
Հայաստանի քաղաքացիները եւ նրանց ժառանգները հիվանդության կամ մահվան դեպքում կկարողանան կենսաթոշակային կուտակային հաշիվներից դրամական միջոցներն արագ ստանալ: Այս մասին նախօրեին խորհրդարանում հայտարարել էր Կենտրոնական բանկի փոխնախագահ Ներսես Երիցյանը՝ ներկայացնելով «Կուտակային կենսաթոշակների մասին» օրենքում փոփոխությունների օրինագիծը եւ մի շարք ուղեկցող օրինագծերը:
Այժմ կենսաթոշակային հաշիվ ունեցողներն իրենց կուտակումները կկարողանան ավելի հեշտ ստանալ անհետաձգելի բուժման համար, իսկ կյանքից հեռանալու դեպքում միջոցներն արագ կստանան նրանց ժառանգները: Դրա համար կենսաթոշակային կուտակային հաշիվները կառավարող Կենտրոնական ավանդային կազմակերպությունը պետք է կարգավորի նոտարիուսների եւ այլ մարմինների հետ տվյալների փոխանակումը:
