1991-ից ի վեր գլխավոր քաղաքական դերում եղել է Հայաստանի հանրապետական կուսակցությունը։ Այս մասին մարտի 2-ին խորհրդարանում լրագրողների հետ զրույցում ասել է Ազգային Ժողովի փոխնախագահ, ՀՀԿ մամուլի քարտուղար Էդուարդ Շարմազանովը՝ պատասխանելով հարցին, թե նախընտրական ծեծկռտուքներում ու վեճերում գլխավոր դերում ՀՀԿ ներկայացուցիչներն են։
«Ինչ վերաբերում է նախընտրական պայքարին, ապա ես կիսում եմ ընկերոջս՝ Դավիթ Հարությունյանի կարծիքը, ով ասում է, որ գործընթացում, որտեղ ընդգրկված են ավելի քան 1000 թեկնածուներ, էլ չեմ խոսում նրանց կողմնակիցների, ակտիվիստների մասին, բնականբար չեն կարող միջադեպեր չլինել։ Բայց մենք ամեն ինչ կանենք, որ այդ միջադեպերի մեղավորնեը պատժվեն, եւ ամեն ինչ լինի օրենքի շրջանակներում»,-նշել է Շարմազանովը։
Նա ընդգծել է, որ Հայաստանի հանրապետական կուսակցությունը դատապարտում է նման քայլերը։ «Եվ Հայաստանի հանրապետական կուսակցությունն աչք չի փակի ոչ մի միջադեպի վրա»,-հավելել է Էդուարդ Շամազանովը։
Նշենք, որ համաձայն մամուլում հապարակումների՝ Արարատի մարզում դանակակռիվ է տեղի ունեցել իշխող կուսակցության եւ «Ծառուկյան» դաշինքի ներկայացուցիչների միջեւ։