Իսրայելի վարչապետ Բենյամին Նեթանյահուն մտադիր է հարաբերություններ հարթել հնարավորինս շատ մուսուլմանական երկրների հետ։ Այս մասին NEWS.am –ի թղթակցին տված հարցազրույցում ասել է Մերձավոր արեւելքի հարցերով ամերիկացի փորձագետ Ալոն Բեն- Մեիրը։
Պատասխանելով անցած տարվա դեկտեմբերին Ադրբեջան ու Ղազախստան Նեթանյահուի կատարած այցելությունների ու Իրանի նախագահի՝ Հայաստան, Ղրղզստան ու Ղազախստան այցելությունների հետ դրա հնարավոր կապի մասին հարցին՝ փորձագետը նշեց․ «Չեմ կարծում, թե ուղեւորություների միջեւ որևէ կապ կա։ Նեթանյահուն մտադիր է հարաբերություններ հարթել հնարավորինս շատ մուսուլմանական երկրների հետ ու միաժամանակ փորձում է մարգինալիզացնել իսրայելա-պաղեստինյան հակամարտությունը»։
Նյու Յորքի համալսարանի պրոֆեսոր ու «Համաշխարհայի քաղաքականության ինստիտուտի» մերձավորարեւելյան բաժանմունքի տնօրեն Բեն Մեիրը, շեշտեց, որ շատանում են այն մուսուլմանական պետությունները, որոնք շահագրգռված են հարաբերություններ հաստատել Իսրայելի հետ, որպեսզի օգուտ քաղեն տեխնոլոգիաների ու զենքի ոլորտում Իսրայելի ձեռքբերումներից։
Պրոֆեսորը նաեւ մեկնաբանել է Իսրայելի ու մեկ այլ մուսուլմանական երկրի՝ Թուրքիայի միջեւ հարաբերությունների կարգավորումը։ Խոսելով կարգավորման պատճառների մասին՝ Բեն Մեիրը նշել է,որ Թուրքիայի ու Իսրայելի մերձեցման հիմքում բացառապես փոխադարձ շահերն են։ «Կողմերից ոչ մեկը մյուսին չի վստահում ո ւ երկուսն էլ համաձայն են մի կողմ դնել իրենց տարաձայնությունները ու ընդլայնել տնտեսական ու առեւտրային հարաբերությունները, որոնցից կարող են օգուտ քաղել»,- շեշտեց փորձագետը։
