Նախագահ Սերժ Սարգսյանն այսօր ընդունել է ՌԴ անվտանգության խորհրդի քարտուղար Նիկոլայ Պատրուշեւին:
Զրուցակիցները երկուստեք գոհունակությամբ են արձանագրել, որ հայ եւ ռուս ժողովուրդների ամուր բարեկամության վրա հիմնված միջպետական ռազմավարական դաշնակցային հարաբերությունները դինամիկ զարգանում են, տարեցտարի ընդլայնվում է համագործակցության օրակարգը, որին զգալիորեն նպաստում են բարձր մակարդակի փոխայցելությունները: Ինչպես երկկողմ, այնպես էլ բազմակողմ ձեւաչափերով հայ-ռուսական հարաբերություններում ՀՀ Նախագահը եւ ՌԴ անվտանգության խորհրդի քարտուղարը մեծապես կարեւորել են համագործակցությունը անվտանգության ոլորտում:
Նախագահ Սարգսյանը բարձր է գնահատել ՀՀ ազգային անվտանգության խորհրդի քարտուղարության եւ ՌԴ անվտանգության խորհրդի աշխատակազմի միջեւ հաստատված հարաբերությունների մակարդակը եւ հույս հայտնել, որ Նիկոլայ Պատրուշեւի այցը նոր խթան կհաղորդի ինչպես այդ երկու կառույցների, այնպես էլ ընդհանուր առմամբ անվտանգության ոլորտում միջպետական հարաբերությունների ամրապնդմանն ու խորացմանը:
Հանդիպմանն անդրադարձ է եղել նաեւ արագ փոփոխվող աշխարհում միջազգային արդի խնդիրներին եւ մարտահրավերներին, տարածաշրջանային զարգացումներին, ԼՂ հիմնախնդրի կարգավորման գործընթացի ներկա վիճակին, ինչպես նաեւ փոխադարձ հետաքրքրություն ներկայացնող այլ հարցերի:
