Մեր իշխանություններից հեռու չէ ճնշումներ գործադրելն ընտրողների նկատմամբ, քանի որ մի քանի տեղերում ժողովրդի պատրաստակամությունն ու մարդկանց քանակը խոսում է հենց դրա մասին: Այս մասին այսօր՝ մարտի 7-ին, Նոյեմբերյանում մի քանի լրագրողների հետ զրույցում ասաց «Օհանյան- Րաֆֆի- Օսկանյան» դաշինքի ընտրական ցուցակը գլխավորող, պաշտպանության նախկին նախարար Սեյրան Օհանյանը՝ անդրադառնալով իրենց դաշինքի անդամ Արմեն Մարտիրոսյանի հայտարարությանը, թե հանրահավաքներին շատ քիչ մարդ է մասնակցում, քանի որ իշխանությունների կողմից ճնշումներ կան:
«Ընդհանուր առմամբ, մարդկանց քանակը բավարար է, բայց երկու կետում սակավաթիվ էր: Մենք տեղեկություններ ունենք, որ փորձում են այս կամ այն լծակներով ազդել, որ ժողովուրդը չհավաքվի, բայց դրա դեմն առնելու մեթոդները մենք գիտենք եւ համապատասխան միջոցներ մենք կձեռնարկենք»,- ասաց նա:
Նշենք, որ դաշինքը նախընտրական քարոզարշավը սկսել է մարտի 6-ին՝ այցելելով Տավուշի մարզ: Մասնավորապես, այդ օրը Բերդում շատ քիչ ընտրող էր հավաքվել, սա, ըստ Արմեն Մարտիրոսյանի, ճնշումների հետեւանք է:
