Գիշերը Վանաձորի կենտրոնական Տիգրան Մեծի պողոտայում փակցված «Ելք» դաշինքի պաստառների վնասելու հետ կապված դաշինքի անդամ Քրիստ Մարուքյանը ֆեյսբուք սոցիալական ցանցում հրապարակային կասկած էր հայտնել, որ հնարավոր է տեղի ունեցածը կապ ունի ՀՀԿ-ի ներկայացուցիչների հետ:
«Նախկինում եղել է նմանատիպ գործելաոճ: Հիմա էլ եթե հաշվի առնենք, որ միայն ԱԺ պատգամավոր Էդմոն Մարուքյանի պաստառներն են հիմնականում փչացրել, դրանից կարելի է ենթադրել, որ այն մարդիկ, ում խանգարում է Է. Մարուքյանը, իսկ դա հանրապետականի կողմից առաջադրված մարդիկ են հիմնականում Լոռու մարզում: Հիմնական մրցապայքարը մենք ինչպես միշտ նշել ենք, հանրապետականի հետ է, հետեւաբար ենթադրություններս ուղղվել էին այդ ուղղությամբ»,- NEWS.am-ի թղթակցի հետ զրույցում նշեց Քրիստ Մարուքյանը, հավելելով, որ եթե դադարեն նմանատիպ գործողությունները, ուրեմն դա հանրապետականի մակարդականով որոշում է, եթե ոչ՝ ուրեմն կա հստակ ձեռագիր եւ կա հստակ ծրագիր:
Վանաձորի քաղաքապետ Մամիկոն Ասլանյանը, սակայն, տեղին չի համարում նման հայտարություններ անելը:
«Ես չեմ ուզում որեւէ մեկի հայտարարությունները մեկնաբանել, դրա համար այս երկրում կան իրավապահ մարմիններ, կան ընտրությունների ընթացքը վերահսկող մարմիններ, ովքեր համապատասխան գնահատականներ կտան, իսկ քարոզչության առաջին երկու օրվա համար չեմ կարծում, թե այս րոպեական հայտարարություններ անելը տեղին է: ՀՀԿ-ն լուրջ քաղաքական ուժ է, իշխող կուսակցություն է, ընտրությունների կազմակերպման օրինականության ապոհվման ողջ պատասխանատվությունը կրում է ՀՀԿ-ն եւ ՀՀԿ-ն այնքան թույլ ուժ չէ, որ նախընտրական պաստառներ պատռելու միջոցով ինչ-որ քարոզչական հնարքներ օգտագործվեն: Կարծում եմ՝ անողները քաղաքական հոտառություն ու կողմնորոշում չունեցող մարդիկ են»,- նշեց քաղաքապետը:
Նա հորդորեց բոլոր ուժերին նախընտրական քարոզարշավն անցկացնել հանդուրժողականության մթնոլորտում:
«Կուզեի մենք ավելի շատ սեւեռվեինք մեր ծրագրերի, մեր գործողությունների, մեր ապագա պլանների վրա եւ չտարվեինք ինչ-որ մանր խուլիգանական դեպքերով»,- նշեց նա:
