Նախընտրական միջադեպերը շարունակվում են: Վանաձորում վնասել են «Ելք» դաշինքի գովազդային պաստառները. դրանք սեւ ներկով են ներկել, մի քանիսն էլ՝ պոկել:
Քրիստ Մարուքյանը կասկածներ ունի, թե ով կարող էր դա կազմակերպել: Վանաձորի քաղաքապետը, սակայն, հերքում է միջադեպի հանրապետականների մասնակցությունը: Մամիկոն Ասլանյանը վստահ է, որ պաստառները փչացնողները քաղաքական հոտառություն ու կողմնորոշում չունեցող մարդիկ են: Մինչ այդ, դաշինքի ներկայացուցիչներն այսօր շրջել են Երեւան վարչական շրջաններում եւ նորից «Ելք»-ի միջոցով ելք առաջարկել ժողովրդին:
Իսկ Տավուշում գտնվող «Օհանյան-Րաֆֆի-Օսկանյան» դաշինքի ներկայացուցիչները գոհ են նախընտրական հանդիպումներից, չնայած կարծում են, որ ժողովրդին ճնշում են եւ թույլ չեն տալիս մասնակցել իրենց հավաքներին:
Լրագրողներին կրկին հետաքրքրել է Սեյրան Օհանյանի ունեցվածքը: Լուրեր են պտտվում, որ պաշտպանության նախարար աշխատած տարիներին նա Սեւանում սեփական տուն է կառուցել, իսկ Ֆրանսիայում՝ հիվանդանոց ձեռք բերել:
Տավուշում է նաեւ Գագիկ Ծառուկյանը: Նախընտրական հանդիպումները սահմանամերձ մարզից է սկսել, քանի որ վստահ է. պետության զարգացումը կախված է երկրի անվտանգությունից: Ծառուկյանը ո՛չ փողի, ո՛չ պաշտոնի կարիք չունի, բայց չի ուզում ձեռքերը ծալած նստել, ուզում է օգուտ տալ ժողովրդին:
Բերդավանում հանդիպման ժամանակ գյուղացիներից մեկը հիշել է, որ Գագիկ Ծառուկյանն իրեն պարտք է: Ծառուկյանն առաջարկել է անմիջապես վճարել խաղողի դիմաց պարտքը, իսկ լրագրողներին հորդորել է դա որպես ընտրակաշառք չընկալել։ Բերդավանցին, սակայն, բարեհոգի է գտնվել. հարցը հաջորդ մթերման ժամանակ կլուծեն:
Նախագահ Սերժ Սարգսյանը Ֆրանսուա Օլանդի հրավերով պաշտոնական այցով Ֆրանսիա է մեկնել: Փարիզում նա կհանդիպի իր ֆրանսիացի գործընկերոջ հետ, նախատեսված են նաեւ այդ երկրի բարձրաստիճան այլ պաշտոնյաների հետ հանդիպումներ: Հայ-ֆրանսիական բարձր մակարդակի բանակցությունների արդյունքներով երկկողմ հարաբերությունների ամրապնդմանն ու փոխգործակցության խորացմանն ուղղված մի շարք փաստաթղթեր են ստորագրվելու:
Վարչապետ Կարեն Կարապետյանը կառավարական մեծ պատվիրակությամբ Ղրղզստանում է: Բիշքեկում կայացել է Եվրասիական միջկառավարական խորհրդի նիստը: Նիստի ընթացքում ունեցած ելույթում Կարեն Կարապետյանը կարծիք է հայտնել, որ տնտեսական հարաբերությունների ակտիվացմանն ու խոչընդոտների վերացմանը վերաբերող հարցերի լուծման առումով սա ճիշտ հարթակ է, բայց այն լիարժեք չի օգտագործվում:
Բիշքեկում Կարապետյանը հանդիպել է նաեւ Ռուսաստանի վարչապետ Դմիտրի Մեդվեդեւի հետ: Գործընկերները քննարկել են հայ-ռուսական ներդրումային հիմնադրամի ստեղծմանը, Մեղրու ազատ տնտեսական գոտուն, հայ-ռուսական տնտեսական օրակարգին վերաբերող այլ հարցեր:
Դոնալդ Թրամփը մահմեդական բնակչությամբ երկրների դեմ հերթական հրամանագիրն է ստորագրել: Այս անգամ ԱՄՆ այցելելու հնարավորությունից զրկվել են վեց երկրների՝ Իրանի, Եմենի, Լիբիայի, Սիրիայի, Սոմալիի եւ Սուդանի քաղաքացիները: Այս պետություններից մի քանիսն ընդգրկված էին նաեւ միգրացիոն քաղաքականության շուրջ Թրամփի նախորդ հրամանագրում, որը, սակայն, երկրի դաշնային դատարանն արգելափակել էր: Նոր հրամանագիրն ուժի մեջ կմտնի մարտի 16-ից: Դրանում, ի դեպ, ոչ մի խոսք չկա սիրիացի փախստականների ընդունման ամբողջական արգելքի մասին:
«Հաց բերողը»՝ Արթուր Սարգսյանը, վերակենդանացման բաժանմունքից ընդհանուր հիվանդասենյակ է տեղափոխվել, բայց շտապում է դուրս գրվել հիվանդանոցից: 25 օր տեւած հացադուլից հետո Սարգսյանը համեմատաբար կազդուրվել է, արդեն նորմալ սնվում է, բայց, բժիշկների պնդմամբ, դեռ հսկողության կարիք ունի: Հիշեցնենք, որ գլխավոր դատախազությունը երեկ վերացրել էր Արթուր Սարգսյանի նկատմամբ ընտրված խափանման միջոց կալանավորումը, եւ նրան քաղաքացիական հիվանդանոց էին տեղափոխել:
Արմավիրի մարզում ողբերգական դեպք է տեղի ունեցել: Մուսալեռ գյուղի տներից մեկը փլուզվել է: Դեպքի վայր ժամանած փրկարարները փլատակների տակից դուրս են բերել տարեց տանտիրուհու՝ 93-ամյա Ազնիվ Մուրադյանի դին: Փրկարարական գործողության ընթացքում նոր փլուզման վտանգ է եղել: Պատահարի պատճառները պարզվում են:
Իսկ Սարալանջի ճանապարհին շղթայական ավտովթարի հետեւանքով վիրավոր կա: Իրար է բախվել հինգ ավտոմեքենա, որոնցից 2-ը՝ տաքսի ծառայության մեքենաներ: Տուժածին հիվանդանոց են տեղափոխել:
Եվս մեկ խոշոր վթար է տեղի ունեցել Լոռու մարզում: Վանաձոր-Ստեփանավան ճանապարհին իրար են բախվել «Նիվա» եւ «Ֆոլքսվագեն» մակնիշի մեքենաները: 4 մարդ տարբեր աստիճանի մարմնական վնասվածքներով հիվանդանոց է տեղափոխվել: Տուժածներից մեկի վիճակը ծանր է:
Մարտի 7-ին դոլարն ու եվրոն էժանացել են: Դոլարի փոխարժեքը կազմել է 486 դրամ, եվրոյինը՝ 514, ռուբլունը՝ 8 դրամ 37 լումա, ֆունտինը՝ 593 դրամ:
Մարտի 8-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Գիշերը մայրաքաղաքում կդիտվի 0+2, ցերեկը՝ +11+13 աստիճան տաքություն: