ԱԺ ԲՀԿ խմբակցության պատգամավոր Լյովա Խաչատրյանը դժվարանում է ասել՝ այս փուլում ԲՀԿ-ն ընտրողներին ինչ դիրքորոշմամբ է ներկայանում՝ ընդդիմություն, իշխանություն, թե՞ այլընտրանք:
NEWS.am-ի հարցին՝ այս պահին «Ծառուկյան» դաշինքը ընդդիմությո՞ւն է, այլընտրա՞նք, թե՞ իշխանություն, Լյովա Խաչատրյանը պատասխանեց. «Այսօր ընդդիմություն եւ ոչ ընդդիմություն հասկացողություն գոյություն չունի: Այսօր ընտրություններ են, ում ժողովուրդը ձայների մեծամասնությունը կտա, նա էլ կլինի իշխանություն»:
Դիտարկմանը՝ ժողովրդի համար նաեւ կարեւոր է, թե տվյալ քաղաքական ուժն ինչ դիրքորոշում ունի, պատգամավորը արձագանքեց. «Ժողովրդի համար պարզ է, որ այսօրվա կառավարությունը քաղաքական մեծամասնությունը ծրագրեր է իրականացնում եւ շատ բաների հետ համաձայն չենք, եւ դա է պատճառը, որ ունենք այն, ինչ այսօր ունենք: Մենք ներկայացնում ենք մեր ծրագրերը»:
Ծառուկյան դաշինքից Արագածոտնի մարզում առաջադրված Լյովա Խաչատրյանն այդպես էլ չհստակեցրեց իրենց դիրքորոշումը. «Մենք Հայաստանի քաղաքացի ենք, որը եթե ստանա մեծամասնություն կլինի իշխանություն եւ կձեւավորի կառավարություն ու կիրականացնի իր տնտեսական ծրագրերը»: