Ազգային ժողովի պատգամավոր, «Ժառանգություն» կուսակցության նախկին անդամ Զարուհի Փոստանջյանը չի կարծում, որ նոր խորհրդարանում մեծ փոփոխություններ են սպասվում։
«Եթե ամեն ինչ գնա այնպես, ինչպես ծրագրել է պարոն Սարգսյանը, չեմ կարծում՝ մեծ փոփոխություններ կարող են լինել։ Պատկերը նույնը կարող է լինել եւ էապես փոփոխություններ չպետք է ակնկալել։ Ըստ իս՝ պետք է լինեն արտահերթ ընտրություններ եւ նոր իշխանություններ ձեւավորվեն»,– այսօր՝ մարտի 8–ին, հրավիրված մամուլի ասուլիսի ժամանակ ասաց Զարուհի Փոստանջյանը։
Նրա խոսքով, այս պահի դրությամբ վստահաբար կարելի է ասել, որ ընտրարշավն ու ընտրապայքարը հավասար պայմաններում չեն ընթանում։
Նշենք, որ Զարուհի Փոստանջյանն այսօր հայտարարել է, որ նոր քաղաքական պլատֆորմ է ձեւավորում, որի առաջին համագումարը նախատեսվում է մարտի 15–ին։